पाख्रीबास नगरपालिका–४ स्थित गणेश गुरुङको घरमा जुवा खेलिरहेको सूचनाका आधारमा आइतबार राति करिब २ बजे जिल्ला प्रहरी कार्यालय धनकुटाबाट खटिएको प्रहरी टोलीले उनीहरूलाई पक्राउ गरेको हो ।
धनकुटा — धनकुटाको पाख्रीबासमा कौडा खेलिरहेको अवस्थामा प्रहरीले १५ जनालाई पक्राउ गरेको छ ।
पाख्रीबास नगरपालिका–४ स्थित गणेश गुरुङको घरमा जुवा खेलिरहेको सूचनाका आधारमा आइतबार राति करिब २ बजे जिल्ला प्रहरी कार्यालय धनकुटाबाट खटिएको प्रहरी टोलीले उनीहरूलाई पक्राउ गरेको हो ।
प्रहरी निरीक्षक मयंक मिश्रको कमाण्डमा खटिएको टोलीले जुवा खेलिरहेको अवस्थामा १६ वटा कौडासहित नगद १६ हजार ५ सय रुपैयाँ बरामद गरेको छ । पक्राउ परेका १५ जनाको साथबाट थप २ लाख ९६ हजार ८ सय रुपैयाँसमेत बरामद गरिएको जिल्ला प्रहरी कार्यालय धनकुटाका सूचना अधिकारी प्रहरी नायब उपरीक्षक हेमन्त भण्डारी क्षेत्रीले जानकारी दिए ।
पक्राउ पर्नेमा पाख्रीबास नगरपालिका–६ फलाटेका ४२ वर्षीय बुद्धिमान राई र ६५ वर्षीय डिकबहादुर बस्नेत, वडा नं. ८ मुगाका ३३ वर्षीय रञ्जित राई, ५३ वर्षीय सिंहराज घिसिङ, ३६ वर्षीय जीवन राई, ३४ वर्षीय दिनेश राई र ३८ वर्षीय नगेन्द्र राई छन् ।
त्यस्तै, पाख्रीबास नगरपालिका–४ का ३९ वर्षीय रविकुमार राई, ५२ वर्षीय लालबहादुर पाख्रिन, ४८ वर्षीय राजकुमार निरौला, ४६ वर्षीय पूर्णबहादुर गुरुङ, ४२ वर्षीय देवेन्द्र पौडेल र ४२ वर्षीया सुम्निमा लिम्बू पक्राउ परेका छन् । धनकुटा नगरपालिका–१ हिलेका ५३ वर्षीय नन्दकुमार तामाङ र ५८ वर्षीय टीकाराम तामाङ पनि पक्राउ परेको प्रहरीले जनाएको छ ।
प्रहरीले उनीहरूलाई जिल्ला प्रहरी कार्यालय धनकुटामा ल्याएर थप अनुसन्धान गरिरहेको जनाएको छ । जुवाको खालबाट बरामद गरिएको कुल नगद ३ लाख १३ हजार ३ सय रुपैयाँ रहेको डिएसपी हेमन्त भण्डारी क्षेत्रीले बताए ।
विनोद घिमिरे कान्तिपुर संवाददाता हुन्।
.jpg)