इरानी सञ्चारमाध्यमले केशममा दुई क्षेप्यास्त्र प्रहार र अमेरिकी एमक्यू–९ ड्रोन खसालिएको दाबी गरेपछि ट्रम्पको भनाइ आएको हो।
काठमाडौँ — अमेरिकी राष्ट्रपति डोनाल्ड ट्रम्पले इरानको केशम टापुमा अमेरिकी सेनाले आक्रमण गरेको पुष्टि गरेका छन् । शुक्रबार अमेरिकी सेनाले इरानको हवाई प्रतिरक्षा प्रणालीलाई लक्षित गरी आक्रमण गरेको उनले बताएको समाचारसंस्था अलजिजरा ले उल्लेख गरेको छ ।
फ्लोरिडाको वेस्ट पाम बिचमा पत्रकारहरूसँग कुरा गर्दै ट्रम्पले इरानले नयाँ हवाई प्रतिरक्षा उपकरण बनाएको र अमेरिकी सेनाले त्यसलाई केही मिनेटमै ध्वस्त पारेको दाबी गरे ।
'हामी सामान्य आक्रमण गर्छौं । उनीहरूले केही हवाई प्रतिरक्षा उपकरण बनाएका थिए । हामीले त्यसलाई करिब १५ मिनेटमा, सम्भवतः पाँच मिनेटमै ध्वस्त पार्यौं,' उनले भने ।
ट्रम्पको यो भनाइ होर्मुज जलडमरूमध्यस्थित केशम टापुको सुजा क्षेत्रमा दुईवटा क्षेप्यास्त्र आक्रमण भएको इरानी सरकारी सञ्चारमाध्यमले जनाएपछि आएको हो । होर्मुज जलडमरूमध्य विश्वकै प्रमुख तेल ढुवानी मार्गमध्ये एक हो ।
इरानको सरकारी प्रसारण संस्था आईआरआईबीले इरानी सेनाको वक्तव्य उद्धृत गर्दै केशम टापुमाथि उडिरहेको अमेरिकी एमक्यू–९ ड्रोनलाई इरानी हवाई प्रतिरक्षा बलले अवरोध गरी खसालेको जनाएको छ ।
केशम टापुमा विस्फोटका आवाज सुनिएको समाचार सार्वजनिक भएपछि अमेरिकी सेनाको केन्द्रीय कमान्ड (सेन्टकम)ले त्यहाँको अवस्था तुलनात्मक रूपमा शान्त रहेको जनाएको छ । सेन्टकमका एक अधिकारीले अलजजिरासँग घटनाबारे जानकारी रहेको तर थप टिप्पणी गर्न नसकिने बताएका छन् ।
यसैबीच, सेन्टकमले शुक्रबार राति सामाजिक सञ्जाल एक्समार्फत इरानको आणविक कार्यक्रमबारे सूचना दिनेलाई २ करोड डलरसम्म पुरस्कार र सम्भावित पुनर्वासको सुविधा उपलब्ध गराउने घोषणा गरेको छ । आणविक कार्यक्रमसँग सम्बन्धित केन्द्र, उपकरण, वैज्ञानिक तथा तिनको आवागमनबारे सूचना दिनेलाई यस्तो पुरस्कार दिइने सेन्टकमले जनाएको छ ।
यसअघि सोमबार पनि केशम टापुमा विस्फोटका घटना भएको इरानी सञ्चारमाध्यमले जनाएका थिए । त्यही समयमा अमेरिकी सञ्चारमाध्यमहरूले होर्मुज जलडमरूमध्यमा अमेरिकी सेनाले रक्षात्मक आक्रमण गरेको समाचार सार्वजनिक गरेका थिए ।
अमेरिकामा मंगलबार भएको मध्यावधि निर्वाचनमा ट्रम्पको रिपब्लिकन पार्टीलाई धक्का लागेपछि इरानमाथि शुक्रबार आक्रमण भएको हो । निर्वाचन परिणामको दोष ट्रम्पले इरानसँगको युद्धलाई दिएका थिए ।
मध्यावधि निर्वाचनपछि ट्रम्पले इरानमाथि आक्रमण गर्ने चेतावनी दिने र युद्ध अन्त्यको सहमति नजिक पुगेको संकेत गर्ने दुवैखाले अभिव्यक्ति दिँदै आएका छन् । बिहीबार उनले अमेरिकाले इरानको बाँकी संरचना ध्वस्त पार्नुपर्ने हुन सक्ने बताएका थिए ।
द न्युयोर्क टाइम्सले बुधबार पेन्टागनका अधिकारी र सैन्य कमान्डरहरूलाई उद्धृत गर्दै अमेरिकाका हजारौं हवाई तथा नौसैनिक फौज इरानविरुद्ध ठूलो स्तरको सैन्य कारबाही पुनः सुरु गर्न तयारी अवस्थामा रहेको जनाएको थियो ।
एक दर्जनभन्दा बढी पानीजहाज तथा मध्यपूर्व र अमेरिकाका सैन्य अखडामा ती फौज तैनाथ रहेको र ट्रम्पको आदेश पाएलगत्तै परिचालन हुन सक्ने समाचारमा उल्लेख छ ।
.jpg)
