अमेरिकी राष्ट्रपति डोनाल्ड ट्रम्पले उपराष्ट्रपति जेडी भान्सलाई इरानसँगको शान्ति वार्ताबाट हटाएका छन्।
ट्रम्पले बिहीबार सामाजिक सञ्जालमार्फत भान्सलाई अब अमेरिकाका डेमोक्रेटिक पार्टीको शासन रहेका राज्य र सहरमा भ्रष्टाचार तथा अपराधको अनुसन्धानमा ध्यान दिन निर्देशन दिएका छन्।
ट्रम्पले अमेरिकालाई अब इरानसँग कुनै सम्झौता आवश्यक नरहेको पनि बताएका छन्।
भान्सले गरेका थिए इरानसँग वार्ताको प्रयास
ट्रम्पले यसै वर्षको सुरुवातमा इरानसँग वार्ता गर्ने जिम्मेवारी भान्सलाई दिएका थिए। भान्स इरानसँगको युद्धको पक्षमा थिएनन्। अप्रिलमा उनी पाकिस्तान पुगेर इरानी नेताहरूसँग घण्टौँ वार्ता गरेका थिए। तर, त्यसबाट कुनै सहमति हुन सकेन।
हालै भान्सले पुनः इरानसँग वार्ता सुरु गर्ने प्रयास गरेका थिए। उनले कतारमार्फत इरानका वरिष्ठ नेता मोहसिन रजाईलाई पत्र पठाएका थिए।
पत्रमा दुवै देशका अधिकारीबीच छिट्टै बैठक आयोजना गर्ने प्रस्ताव गरिएको थियो। भान्सले अमेरिकी वार्ता टोलीको नेतृत्व आफूले गर्ने पनि बताएका थिए। तर, ट्रम्पले अहिले उक्त प्रयास रोकिदिएका छन्।
भान्सले इरान युद्धलाई चुनावी हारको कारण बताएका थिए
अमेरिकाको मध्यावधि निर्वाचनमा रिपब्लिकन पार्टीले ठूलो क्षति बेहोरेको छ। निर्वाचनपछि भान्सले पार्टीको हारको कारण इरान युद्ध भएको बताएका थिए। उनले सामाजिक सञ्जालमा लेखेका थिए, ‘हाम्रो हारको कारण युद्ध हो।’
भान्सले युद्धका कारण आगामी छ वर्षसम्म सिनेटको नियन्त्रण गुमाउनु उचित निर्णय थियो भन्ने कसैलाई लाग्छ भने आफ्नो धारणा राख्न पनि चुनौती दिएका थिए।
उनको उक्त अभिव्यक्तिलाई ट्रम्प प्रशासनको युद्ध नीतिको आलोचनाका रूपमा हेरिएको थियो। यद्यपि, ट्रम्पले भान्सको भनाइप्रति आफू असन्तुष्ट नरहेको बताएका थिए।
उनले धेरैलाई भान्सको टिप्पणी मन नपरे पनि आफूलाई त्यसले कुनै फरक नपारेको बताएका थिए।
अब डेमोक्रेटिक राज्यमा भ्रष्टाचारको अनुसन्धान गर्ने जिम्मेवारी
ट्रम्पले भान्सलाई डेमोक्रेटिक पार्टीको शासन रहेका सहर तथा राज्यमा भ्रष्टाचार र अपराधको अनुसन्धानमा ध्यान दिन निर्देशन दिएका छन्। अमेरिकाको मिनेसोटा राज्यमा ठगीको ठूलो घटना सार्वजनिक भएको छ। उक्त प्रकरणमा धेरै व्यक्ति पक्राउ परिसकेका छन्।
यसैबीच, भान्सको क्यारेबियन तथा दक्षिण अमेरिकी देशहरूको भ्रमण पनि रद्द गरिएको छ। उक्त भ्रमणमा डोमिनिकन रिपब्लिक, कोलम्बिया, अर्जेन्टिना र चिली जाने कार्यक्रम थियो।
अधिकारीहरूका अनुसार भ्रमणको तयारी अक्टोबरदेखि भइरहेको थियो। सुरुमा डोमिनिकन रिपब्लिकको भ्रमण रद्द गरिएको थियो भने त्यसपछि अन्य देशको यात्रा पनि रोकिएको थियो। यी सबै देश ट्रम्प प्रशासनका निकट मानिन्छन्।
प्रकाशित: २७ कार्तिक २०८३ ०९:२६ शुक्रबार
