कतारी प्रधानमन्त्रीसँगको भेटपछि ट्रम्पले भने: इरान युद्ध 'लगभग सकियो'

इरानको नेतृत्व संरचना ध्वस्त भएको दाबी गर्दै ट्रम्पले परमाणु कार्यक्रम निरस्त्रीकरणका लागि दीर्घकालीन समाधान खोजिरहेको बताए

वासिङ्टन — अमेरिकी राष्ट्रपति डोनल्ड ट्रम्पले इरानसँगको युद्ध सैन्य रूपमा 'लगभग सकिएको' बताएका छन्।

कतारका प्रधानमन्त्री शेख मोहम्मद बिन अब्दुलरहमान बिन जासिम अल थानीसँगको भेटपछि ह्वाइट हाउसको ब्रिफिङ रुममा पत्रकारहरूसँग कुरा गर्दै उनले यस्तो बताएका हुन्।

ट्रम्पले भने, 'इरान सैन्य रूपमा लगभग समाप्त भइसकेको छ, हामी अहिले केवल 'स्ट्याटस क्वो' (यथास्थिति) कायम राखिरहेका छौँ।' इरानको नेतृत्व संरचना ध्वस्त भएको दाबी गर्दै उनले इरानको परमाणु कार्यक्रम निरस्त्रीकरणका लागि दीर्घकालीन समाधान खोजिरहेको बताए।

गएको साता सम्पन्न मध्यावधि निर्वाचनमा रिपब्लिकन पार्टीले कंग्रेसका दुवै सदन गुमाएपछि ट्रम्पको यो अभिव्यक्ति आएको हो। आठ महिना लामो यस युद्धका कारण इन्धनको मूल्य वृद्धि भई विश्व अर्थतन्त्र प्रभावित भएको छ, जसका कारण अमेरिकी मतदाताहरू असन्तुष्ट बनेका थिए।

भेटघाटअघि सामाजिक सञ्जालमा ट्रम्पले मध्यपूर्वी सहयोगी राष्ट्रहरू (कतार, साउदी अरेबिया, युएई, बहराइन, कुवेतलगायत) ले यथास्थिति नै रुचाएको बताएका थिए ।

पत्रकारहरूसँग कुरा गर्दै उनले भने, 'उनीहरू (इरान) हामीसँग निकै शिष्टताका साथ कुरा गरिरहेका छन्। सैन्य कारबाही आवश्यक देखिँदैन, तर परिस्थिति परिवर्तन भएमा हामी पूर्ण तयारी अवस्थामा छौँ।'

यद्यपि, ट्रम्पले इरानी तेल निर्यात रोक्न लगाइएको कडा समुद्री नाकाबन्दी वा तैनाथ अमेरिकी सेना फिर्ताबारे कुनै सङ्केत दिएका छैनन्।

कतारले इरानको परमाणु कार्यक्रमसम्बन्धी प्रस्ताव पेस गरेको बताइएको छ। अर्कोतर्फ, इरानले  युद्धको स्थायी अन्त्यका लागि अमेरिकी नाकाबन्दी अन्त्य, रोक्का सम्पत्ति फुकुवा तथा क्षतिपूर्तिको सर्त राखेको छ।