आगामी मंसिरदेखि लागू हुने योजनाबाट मासिक २० युनिटसम्म खपत गर्ने ५ एम्पियरका करिब ७ हजार २०० घरधुरी लाभान्वित हुनेछन्।
सल्यान — सल्यानको शारदा नगरपालिकाले नगरवासीलाई न्यूनतम विद्युत् शुल्कमा छुट दिने भएको छ । आगामी मंसिरदेखि लागू हुने कार्यक्रमबाट ५ एम्पियरको विद्युत् मिटर जडान गरेका करिब ७ हजार २०० घरधुरी लाभान्वित हुनेछन् ।
यससम्बन्धी सम्झौतामा शारदा नगरपालिका र नेपाल विद्युत् प्राधिकरण सल्यानबीच हस्ताक्षर भएको छ । कार्यक्रमअन्तर्गत मासिक २० युनिटसम्म विद्युत् खपत गर्ने ५ एम्पियरका ग्राहकले तिर्नुपर्ने न्यूनतम विद्युत् शुल्क नगरपालिकाले व्यहोर्नेछ । यो कार्यक्रम २०८४ असार मसान्तसम्म सञ्चालन हुने नगरपालिकाले जनाएको छ ।
नगरप्रमुख प्रकाश भण्डारीले विशेषगरी विपन्न तथा न्यून आय भएका नागरिकलाई लक्षित गरी कार्यक्रम ल्याइएको बताए । सामान्य विद्युत् शुल्क बुझाउनकै लागि सदरमुकामस्थित विद्युत् कार्यालयसम्म पुग्नुपर्ने बाध्यता हटाउने उद्देश्यसमेत रहेको उनको भनाइ छ ।
‘दुर्गम तथा दूरदराजका बस्तीमा बसोबास गर्ने नागरिकले न्यूनतम विद्युत् शुल्क तिर्नकै लागि यातायात भाडा र अन्य खर्च गरेर सदरमुकाम आउनुपर्ने अवस्था छ,’ उनले भने, ‘त्यस्तो बाध्यता अन्त्य गर्न र विपन्न नागरिकलाई राहत दिन कार्यक्रम ल्याएका हौं । यसबाट नगरपालिकाका करिब ७० देखि ७५ प्रतिशत नागरिक लाभान्वित हुने अपेक्षा गरेका छौं ।’
कार्यक्रमबाट सुविधा लिन ५ एम्पियरको मिटर जडान गरेका ग्राहकले एकपटक सम्बन्धित वडा कार्यालयमा निवेदन दिनुपर्नेछ । त्यसपछि मासिक २० युनिटसम्मको न्यूनतम विद्युत् शुल्क नगरपालिकाले भुक्तानी गर्नेछ।
नगरपालिकाका अनुसार कार्यक्रमले न्यूनतम विद्युत् शुल्कको आर्थिक भार कम गर्नुका साथै सामान्य शुल्क बुझाउनकै लागि सदरमुकाम धाउनुपर्ने बाध्यता हटाउनेछ ।
सरिता चलाउने कान्तिपुरकी सल्यान संवाददाता हुन् ।
