संघीय सरकारकी मन्त्री सीता बादीसँगको भेटमा उनले कर्णालीका कमजोर सामाजिक तथा स्वास्थ्य सूचक सुधारका लागि थप कार्यक्रम र बजेट व्यवस्था गर्नुपर्ने बताए।
सुर्खेत — कर्णाली प्रदेशका मुख्यमन्त्री मङ्गलबहादुर शाहीले बालमृत्युदर, कुपोषण, पुड्कोपना र बालविवाह न्यूनीकरणका लागि विशेष कार्यक्रम ल्याउन संघीय सरकारसँग आग्रह गरेका छन्।
शुक्रबार मुख्यमन्त्री तथा मन्त्रिपरिषद्को कार्यालयमा संघीय सरकारकी महिला, बालबालिका, लैङ्गिक तथा यौनिक अल्पसंख्यक र सामाजिक सुरक्षा मन्त्री सीता बादीसँगको भेटमा उनले कर्णालीका कमजोर सामाजिक तथा स्वास्थ्य सूचक सुधारका लागि संघीय सरकारले थप कार्यक्रम र बजेट व्यवस्था गर्नुपर्ने बताएका हुन्।
मुख्यमन्त्री शाहीले कर्णालीमा विद्यमान बालमृत्युदर, कुपोषण, पुड्कोपना र बालविवाहजस्ता समस्या समाधान गर्न नियमित कार्यक्रमले मात्र नपुग्ने भन्दै विशेष प्रकृतिका कार्यक्रम सञ्चालन गर्नुपर्नेमा जोड दिए।
संघीय मन्त्री बादी पनि कर्णालीकै प्रतिनिधित्व गर्ने भएकाले प्रदेशका यी समस्याप्रति विशेष चासो दिएर पहल गर्न उनले आग्रह गरे। उनले पछिल्लो समय चुनौतीका रूपमा देखिएको किशोरकिशोरीको मानसिक स्वास्थ्य समस्यालाई पनि प्राथमिकतामा राख्नुपर्ने बताए। यस क्षेत्रमा ठोस कार्यक्रम ल्याउन उनले मन्त्री बादीको ध्यानाकर्षण गराए।
जवाफमा मन्त्री बादीले कर्णालीको समग्र विकास र सूचक सुधारका लागि प्रदेश सरकारसँग सहकार्य गर्न संघीय सरकार तयार रहेको बताइन्। उनले कर्णालीमा बालसुधार गृह स्थापनाका लागि आवश्यक पहल भइरहेको जानकारी दिइन्।
भेटमा प्रदेशका सामाजिक विकासमन्त्री जितबहादुर मल्लले स्वास्थ्य तथा शिक्षा क्षेत्रको सुधारका लागि प्रदेश सरकारले काम गरिरहेको भन्दै संघीय सरकारको निरन्तर सहकार्य आवश्यक रहेको बताए। उनले आगामी दिनमा संघ र प्रदेशबीचका बैठक तथा भेटघाटलाई नियमित र परिणाममुखी बनाउनुपर्ने धारणा राखे।
ज्योति कटुवाल कान्तिपुरकी सुर्खेत संवाददाता हुन् ।
