त्रिवि अन्तर्राष्ट्रिय क्रिकेट मैदानमा जितसँगै सुदूरपश्चिम छ अंकसहित दोस्रो स्थानमा उक्लिँदा कर्णाली चार अंकमै सीमित भयो।
काठमाडौँ — सुदूरपश्चिम रोयल्सले नेपाल प्रिमियर लिग (एनपीएल) तेस्रो सिजनको शुक्रबार त्रिवि अन्तर्राष्ट्रिय क्रिकेट रंगशाल कीर्तिपुरमा भएको खेलमा कर्णाली याक्सलाई ३९ रनले हराएर प्ले–अफका लागि दाबेदारी पेस गरेको छ । यो जितपछि दुई पल्टको उपविजेताको छ अंक भएको छ र दोस्रो स्थानमा उक्लेको छ । हारले कर्णाली भने चार अंकमै सीमित रह्यो । कर्णालीमाथि सुदूरपश्चिमको यो लगातार तेस्रो जित पनि हो ।
जितका लागि १ सय ७७ रनको लक्ष्य पछ्याएको कर्णालीले ब्याटबाट राम्रो प्रदर्शन गर्न सकेन र बढ्दो आवश्यक रन रेटका कारण दबाबमा रह्यो । खेल सकिँदा कर्णाली सात विकेट गुमाएर १ सय ३७ रनको स्थितिमा रह्यो । दक्षिण अफ्रिकी ब्याटर डेभिड मिलरले नटआउट ९३ रन बनाए पनि त्यो पर्याप्त रहेन । उनले ५५ बलको सामना गरेर पाँच चौका र सात छक्का प्रहार गरे ।
यसअघि ओपनर अरिफुल इस्लाम अनिल खरेलले लिएको प्रतियोगिताकै उत्कृष्ट क्याचमा शून्य रनकै स्थितिमा आउट भए । अर्का ओपनर वाटले चार रन मात्र बनाए । दीपक डुम्रे पनि १८ बलमै अनिलकै सिकार बने । पवन सर्राफले पनि रनबाट धेरै योगदान गर्न सकेनन् र पाँच रनमै रोकिए । हुसेन तलत एकै रनमा दीपेन्द्रसिंह ऐरीको बलमा एलबीडब्लू भए । कप्तान सोमपाल कामी आठ रनमै समेटिए भने गुल्सन झाको ब्याटबाट तीन रन मात्रै निस्केको थियो ।
सुदूरपश्चिमका बलरमध्ये स्कट कुग्लेनले दुई विकेट लिए । यसअघि सुदूरपश्चिमले पहिले ब्याटिङ गर्दै ६ विकेटमा १ सय ७६ रन बनाएको थियो । सुदूरपश्चिमका लागि थरिन्दु रथ्नायेके २२ र स्कट कुग्गलेन १३ रनमा नटआउट रहे । सुदूरपश्चिमको सुरुआत राम्रो रह्यो र पहिलो विकेटका लागि विनोद भण्डारी र सैफ जैबले ६८ रनको साझेदारी गरे । विनोद २७ रन बनाएर रनआउट भए । उनले २२ बलमा दुई चौका र दुई छक्का प्रहार गरे ।
लगत्तै जैब पनि ३५ रन बनाएर सूर्य तामाङको बलिङमा बोल्ड भए । जैबले २४ बलको सामना गरे तथा त्यसमा चार चौका र एक छक्का सामेल थियो । उनीहरू क्रिजमा छँदासम्म ठूलो स्कोरको सम्भावना देखिएको थियो । तर दुवै आउट भएपछि रनको गति सुस्ताएको थियो र कर्णालीका बलर हाबी भए । स्कोरले ९५ रन छुँदा कप्तान दीपेन्द्रसिंह ऐरी पनि १० रन बनाएर पबेलियन फर्के ।
कर्णालीका विकेटकिपर दीपक डुम्रेको चलाखीपूर्ण स्टम्पिङमा ऐरी आउट भएका हुन् । ब्रेन्डन म्याकमुलेनले १६ बलमा २४ रन थपेर नन्दन यादवको सिकार भए । इशान पाण्डे २३ रन बनाएर वाटको बलमा क्याच आउट भए । मिलरले उनको क्याच लिएका हुन् । आरिफ सेखले १४ बल खेलेर ११ रन मात्र बनाउन सके । कर्णालीका बलरमध्ये वाटले २७ रन खर्चेर दुई विकेट लिए ।
.png)
