.png)
सुदूरपश्चिम रोयल्स नेपाल प्रिमियर लिग (एनपीएल) को तेस्रो संस्करणमा लगातार तेस्रो पटक प्लेअफमा प्रवेश गर्न सफल भएको छ। शुक्रबार कीर्तिपुरस्थित त्रिवि क्रिकेट मैदानमा भएको खेलमा काठमाडौं गोर्खाजलाई ७ रनले पराजित गर्दै सुदूरपश्चिमले प्लेअफमा आफ्नो स्थान सुरक्षित गरेको हो।
सुदूरपश्चिमले लिग चरणको अन्तिम खेलमा जित निकाल्दै १० अंकसहित अंकतालिकाको शीर्ष स्थानमा उक्लिएको छ। टोलीले सात खेलमध्ये पाँचमा जित र दुईमा हार बेहोरेको छ।
सुदूरपश्चिमले दिएको १२६ रनको लक्ष्य पछ्याएको काठमाडौं गोर्खाजले निर्धारित २० ओभरमा सात विकेट गुमाउँदै ११८ रन मात्रै बनाउन सक्यो।
काठमाडौंलाई अन्तिम ओभरमा जितका लागि १६ रन आवश्यक थियो। तर, टोलीले आठ रन मात्रै जोड्न सक्यो। काठमाडौंका लागि रासिद खानले अविजित ३५ रन बनाए। त्यसैगरी दुसान हेमान्थाले २१ रन बनाए भने साम हेजलेट ११ रनमा आउट भए। सन्तोष यादवले १० र आदिल आलमले आठ रनको योगदान दिए।
सुदूरपश्चिमका लागि अनिल खरेलले दुई विकेट लिए। हेमन्त धामी, स्कट कुगेलाइन र फाबियन एलेनले समान एक–एक विकेट हात पारे।
त्यसअघि टस जितेर काठमाडौंले फिल्डिङ रोजेपछि पहिले ब्याटिङ गरेको सुदूरपश्चिमले निर्धारित २० ओभरमा ६ विकेट गुमाएर १२५ रन बनाएको थियो।
खेलको सुरुवातमै दबाबमा परेको सुदूरपश्चिमले २.३ ओभरमा आठ रन जोड्दा चार विकेट गुमाइसकेको थियो। त्यसपछि आरिफ शेख र कप्तान दीपेन्द्रसिंह ऐरीले पाँचौँ विकेटका लागि ५४ रनको महत्वपूर्ण साझेदारी गर्दै टोलीलाई सम्हाले।
आरिफ १६ रन बनाएर रनआउट भए। त्यसपछि दीपेन्द्र र थरिन्दु रत्नायकेले छैटौँ विकेटका लागि ५४ रनको साझेदारी गरेपछि सुदूरपश्चिमले प्रतिस्पर्धात्मक योगफल तयार पारेको थियो।
कप्तान दीपेन्द्रले उत्कृष्ट ब्याटिङ गर्दै ५५ बलमा चार चौका र दुई छक्काको मद्दतमा ६० रन बनाए। उनी जहानदाद खानको बलमा भीम सार्कीबाट क्याच आउट भए। उनले ४६ बलमा चार चौका र दुई छक्कासहित अर्धशतक पूरा गरेका थिए।
थरिन्दु रत्नायके २६ रन र फाबियन एलेन दुई रनमा अविजित रहे। ओपनर स्कट कुगेलाइनले छ र विनोद भण्डारीले एक रन बनाए। ब्रान्डन म्याकमुलेन र इशान पाण्डेले भने खाता खोल्न सकेनन्।
काठमाडौंका लागि जहानदाद खानले तीन तथा सन्तोष यादवले दुई विकेट लिए।
यस हारसँगै काठमाडौं गोर्खाजको प्लेअफ यात्रा तत्कालका लागि निश्चित हुन सकेन। चार खेलमा जित र दुई खेलमा हार बेहोरेको काठमाडौं आठ अंकसहित तालिकाको तेस्रो स्थानमा छ। टोलीले लिग चरणको आफ्नो अन्तिम खेल पोखरा एभेन्जर्ससँग खेल्नेछ।
यसैबीच, शुक्रबार नै हुने अर्को खेलमा चितवन राइनोज र जनकपुर बोल्ट्स भिड्दैछन्। कीर्तिपुरस्थित त्रिवि क्रिकेट मैदानमा हुने उक्त खेल साँझ ५ बजे सुरु हुनेछ।
लिग चरणमा दुई खेल जितेको, दुई खेल हारेको र एक खेलमा अंक बाँडेको चितवन पाँच अंकसहित तालिकाको पाँचौँ स्थानमा छ। प्लेअफको सम्भावना बलियो बनाउन चितवन आजको खेल जित्ने लक्ष्यमा हुनेछ।
यता, दुई जित र चार हारसहित चार अंक जोडेको जनकपुर छैटौँ स्थानमा छ। आजको खेलमा पराजित भए जनकपुर प्लेअफ दौडबाट बाहिरिनेछ भने जित हासिल गरे अन्य टोलीको नतिजामा निर्भर रहनुपर्नेछ।
प्रकाशित: २७ कार्तिक २०८३ १६:३५ शुक्रबार
