१९ कात्तिक, काठमाडौं । अस्ट्रेलियाको सबैभन्दा पुरानो डिपार्टमेन्ट स्टोरको चेन डेभिड जोन्सको जिम्मा प्रशासनले लिएको छ । प्रशासनको जिम्मामा गएसँगै यसमा कार्यरत हजारौँ कर्मचारीको रोजगारी जोखिममा परेको छ।
स्थानीय रूपमा डीजेजका नामले चिनिने यो १८८ वर्ष पुरानो खुद्रा विक्रेता लामो समयदेखि आर्थिक सङ्घर्षसँग जुधिरहेको थियो। ग्राहकहरू पारम्परिक पसलहरू छोडेर अनलाइन सपिङङतर्फ आकर्षित भएपछि कम्पनीलाई यो अवस्था आएको हो।
स्वैच्छिक प्रशासक म्याकग्राथ निकोलले रिसीभर एफटीआई कन्सल्टिङले कम्पनीको पुनरावलोकन नगरेसम्म डेभिड जोन्सका भौतिक तथा अनलाइन स्टोरहरू सञ्चालनमा रहने बताएका छन्।
कम्पनीकी सीईओ एरिका बर्थोल्डले भनिन्, ‘डेभिड जोन्स एक प्रतिष्ठित कम्पनी हो र धेरै अस्ट्रेलियालीहरूको डीजेजका स्टोरहरूमा जाने आफ्नै कथा र सम्झनाहरू छन्।’
उनले ब्रान्डसँग ‘भविष्यका लागि व्यापारलाई पुनः सेट गर्ने राम्रो योजना’ रहेको पनि बताइन्। बर्थोल्डले यस कठिन समयमा साथ दिने ग्राहकहरू, टिमका सदस्यहरू र साझेदारहरूलाई धन्यवाद दिएकी छिन्।
डेभिड जोन्समा करिब ६,००० कर्मचारी कार्यरत छन् र यसका ३८ वटा भौतिक स्टोरहरू छन्, जसमा १७ वटा वेस्टफिल्ड सपिङ सेन्टरभित्रै छन्।
बोर्डले प्रशासनमा जाने निर्णय गर्नुभन्दा केही घण्टा अगाडि, वेस्टफिल्डकी स्वामित्वकर्ता कम्पनी सेन्ट्रेले यस रिटेलरले अक्टोबर महिनाको भाडा नतिरेको र भाडा सम्झौता उल्लङ्घन गरेको बताएको थियो।
रिसीभर एफटीआई कन्सल्टिङका क्रिस्टोफर हिलले भने, ‘हामी वर्तमान खुद्रा व्यापारको वातावरण, बढ्दो लागत, ठूलो र पुरानो खुद्रा संरचना तथा आपूर्ति शृङ्खलाका चुनौतीहरूले गर्दा यो अवस्था आएको बुझ्छौं।’
प्रशासक र रिसीभरहरू नियुक्त गरेसँगै डेभिड जोन्सले शान्तिको सास फेर्ने र व्यवसायको पुनर्संरचना गर्ने मौका पाउने हिलले बताए।
धेरै अस्ट्रेलियालीहरूका लागि डेभिड जोन्स र यसको ट्रेडमार्क कालो र सेतो ‘हाउन्डसटुथ’ डिजाइन विलासिताको प्रतीक थियो। तर, म्याक्वेरी युनिभर्सिटी बिजनेस स्कुलकी मार्केटिङ प्राध्यापक जाना बाउडनका अनुसार यसको पतनले डिपार्टमेन्ट स्टोर मोडलको मृत्युको घण्टी बजाएको छ।
‘यो एक समय अस्ट्रेलियामा ग्ल्यामर सहरको प्रतीक थियो— बेलायतको ह्यारोड्सको अस्ट्रेलियाली संस्करण,’ उनले भनिन्, ‘तपाईं त्यहाँ चमक-दमक हेर्न र त्यसको हिस्सा बन्न जानुहुन्थ्यो, जहाँ प्रिमियम लक्जरी लेबलहरू देखेर अचम्मित हुन सकिन्थ्यो र आफू सफल भएको महसुस हुन्थ्यो।’
सिड्नी र मेलबर्नका प्रमुख सहरहरूमा रहेका स्टोरहरूमा जानु धेरै अस्ट्रेलियाली परिवारका लागि एउटा परम्परा नै बनेको थियो, विशेष गरी पर्वको समयमा क्रिसमसको झ्यालको सजावट हेर्नका लागि।
‘मानिसहरू ती झ्यालहरू हेर्न र त्यो जादु अनुभव गर्न सहरभन्दा टाढा-टाढाबाट घण्टौँ यात्रा गरेर आउँथे,’ बाउडनले भनिन्, तर पछिल्ला वर्षहरूमा यो ब्रान्डले आफ्नो चमक गुमाइसकेको थियो।
‘सहरका स्टोरहरूले आफ्नो उच्च वर्गीय शान र सौन्दर्य कायम राखे, तर उपनगरका स्टोरहरू भने निकै फिका रहे— तिनीहरू सामान्य छन्, त्यहाँ कुनै उत्साह छैन र कुनै चमक-दमक छैन,’ उनले थपिन्।
सिड्नी मर्निङ हेराल्डका अनुसार, सन् १९५४ मा महारानी एलिजाबेथ द्वितीयको सिड्नीको पहिलो भ्रमणका क्रममा, तत्कालीन २७ वर्षीया महारानीले एलिजाबेथ स्ट्रिट स्टोरको सातौँ तलाको ब्यान्क्वेट डिनरमा सहभागिता जनाएकी थिइन्।
