मुख्य पर्वमा आफन्त भेला हुने र कार्यक्रम प्रत्यक्ष प्रसारण गर्ने तयारीबीच ओलाङचुङगोलामा फोरजी सेवा बन्द हुँदा स्थानीयको उत्सव प्रभावित भएको छ।
ताप्लेजुङ — चट्याङले ओलाङचुङगोलास्थित नेपाल टेलिकमको टावरमा क्षति पुर्याएको छ । स्थानीयको मुख्य चाड फुटुक पर्व सुरु हुनै लागेका बेला फोरजी टावरमा क्षति पुगेपछि पर्वको रौनकमा समेत असर परेको छ ।
‘बस्तीभन्दा माथि रहेको हिले डाँडामा चट्याङले टावर बिगार्यो । टुजीसम्म चलाउन सकिन्छ कि भनेर प्रयास गर्यौँ,’ फक्ताङलुङ गाउँपालिका–७ का वडाध्यक्ष छेतेन शेर्पा लामाले भने, ‘टेलिकमका प्राविधिक कर्मचारी इलामबाट आउनुपर्ने रहेछ । तिहार सुरु भइसकेकाले हामीले लामो समयसम्म सेवा अवरुद्ध हुने भयो ।’
यहाँ तिहारको औँसीका दिनसम्म फुटुक पर्व मनाइन्छ । यो पर्वमा ओलाङचुङगोलाबाहिर रहेका आफन्त पनि भेला हुन्छन् । फुटुक हेर्न जानेको संख्या पनि उल्लेख्य हुन्छ । ‘अहिले यस्ता चाडपर्वको लाइभ गर्ने, अरूलाई पनि देखाउने र पर्वको चिनारी गराउने प्रचलन छ,’ छेतेनले भने, ‘पर्वकै बेला अवरोध आउँदा केही समस्या हुने रहेछ ।’
टावर रहेको ठाउँमा पुगेर भिडियो कलमार्फत सेवा सञ्चालन गर्न सकिन्छ कि भनेर स्थानीयले प्रयास गरे पनि सम्भव नभएको उनले बताए । ‘प्राविधिकले आउँदैनौँ त भनेका छैनन् । तर, यहाँ आइपुग्न तीन दिन र फर्कन पनि त्यति नै समय लाग्ने भएकाले तिहारपछि मात्रै सम्भव हुने भयो भनेका छन्,’ छेतेनले भने ।
आनन्द गौतम कान्तिपुरका ताप्लेजुङ संवाददाता हुन् ।
-1700232974.jpg)
.png)
