एसजेभीएनका अध्यक्ष तथा प्रबन्ध निर्देशक भूपेन्द्र गुप्ताको नेतृत्वमा निर्देशक (वित्त) पार्थजित दे र निर्देशक (आयोजना) राजेशकुमार चन्देलसहितको टोलीले मंगलबार संखुवासभा पुगेर आयोजनाको भौतिक प्रगति र प्राविधिक तत्परताबारे जानकारी लिएको हो ।
काठमाडौँ — ९०० मेगावाटको अरुण ३ जलविद्युत् आयोजना निर्माण गरिरहेको भारतको एसजेभीएन लिमिटेडको उच्चस्तरिय व्यवस्थापन टोलीले निर्माणाधीन जलविद्युत् आयोजनाहरूको स्थलगत निरीक्षण गरेको छ । एसजेभीएनका अध्यक्ष तथा प्रबन्ध निर्देशक भूपेन्द्र गुप्ताको नेतृत्वमा निर्देशक (वित्त) पार्थजित दे र निर्देशक (आयोजना) राजेशकुमार चन्देलसहितको टोलीले मंगलबार संखुवासभा पुगेर आयोजनाको भौतिक प्रगति र प्राविधिक तत्परताबारे जानकारी लिएको हो ।
टोलीले एसजेभीएनको अरुण-३ जलविद्युत् आयोजनाको बाँधस्थल तथा पावरहाउस लगायतका निर्माण क्षेत्रको अवलोकन गरेका हुन् ।
त्यस्तै तल्लो तटीय क्षेत्रमा रहेको रहेको ६६९ मेगावाटको तल्लो अरुण जलविद्युत् आयोजनाको निर्माण कार्य औपचारिक रूपमा नोभेम्बर २०२६ देखि सुरु गर्ने लक्ष्य राखिएको एसजेभीएनले जनाएको छ । टोलीले तल्लो अरुण आयोजना स्थलको भ्रमण गरी निर्माण सुरु गर्नका लागि भइरहेका पूर्वतयारीबारे विस्तृत समीक्षा गरेको जनाएको छ ।
एसजेभीएनका अध्यक्ष गुप्ताले भौगोलिक रूपमा कठिन परिस्थितिमा पनि खटिएका प्राविधिक तथा कर्मचारीहरूको प्रशंसा गरे । 'अप्ठ्यारो भू-बनोटका बाबजुद इन्जिनियर र कर्मचारीहरूले देखाएको समर्पण सराहनीय छ । यी रणनीतिक आयोजनाहरू तोकिएको समयमै सम्पन्न गर्न सम्पूर्ण टोलीको प्रतिबद्धता निकै महत्त्वपूर्ण छ,' उनले भने ।
भ्रमणका क्रममा उच्च नेतृत्वले आयोजना निर्माणमा संलग्न ठेकेदार कम्पनीका प्रतिनिधिहरूसँग छुट्टै समीक्षा बैठक पनि आयोजना गरेको थियो । तोकिएको समयसीमा र गुणस्तरका मापदण्डलाई कडाइका साथ पालना गर्न भन्दै प्रबन्ध निर्देशक गुप्ताले स्रोत-साधनको परिचालन बढाउन, निर्माण स्थलका समस्याहरू तत्काल समाधान गर्न र कामको गति तीव्र पार्न निर्देशन दिए ।
अरुण-३ र तल्लो अरुण दुवै आयोजनाहरू नेपाल र भारतबीचको द्विपक्षीय स्वच्छ ऊर्जा सहकार्यका मुख्य आधार हुन् । एसजेभीएनले यस क्षेत्रको ऊर्जा सुरक्षा र दिगो पूर्वाधार विकासका लागि आफ्नो प्रतिबद्धता दोहोर्याएको कम्पनीको सामाजिक सञ्जाल फेसबुकमा उल्लेख छ ।
(181).png)
(65).jpg)