उत्सवको अवसरमा बुधबार धनगढी–११ र अपि–११ बीच मैत्रीपूर्ण क्रिकेट प्रतियोगिता हुँदैछ ।
काठमाडौँ — समुन्द्री सतहबाट करिब ४ हजार मिटर उचाइमा रहेको अपि हिमाल आधार शिविरमा मंगलबारदेखि ३ दिने अपि हिमाल पर्यटन उत्सव सुरु भएको छ । अपि हिमाल गाउँपालिका–१ स्थित पिल्कन्द मैदानमा आयोजित उत्सवको सुदूरपश्चिम प्रदेशका मुख्यमन्त्री खगराज भट्टले उद्घाटन गरेका हुन् ।
उत्सवको अवसरमा बुधबार धनगढी–११ र अपि–११ बीच मैत्रीपूर्ण क्रिकेट प्रतियोगिता हुँदैछ । उच्च हिमाली क्षेत्रमा क्रिकेट आयोजना गरेर अपि हिमालको पर्यटकीय सम्भावनालाई राष्ट्रिय तथा अन्तर्राष्ट्रियस्तरमा चिनाउने गाउँपालिकाको लक्ष्य छ ।
उद्घाटन अवसरमा मुख्यमन्त्री भट्टले पर्वतारोहण र पर्वतीय पदयात्रा सुदूरपश्चिमको पर्यटन विकासका मुख्य आधार बन्न सक्ने बताए । प्राकृतिक सौन्दर्य र हिमाली सम्पदाले भरिपूर्ण यस क्षेत्रको पर्यटन सम्भावना उपयोग गर्न पूर्वाधार विकास र प्रचारप्रसार आवश्यक रहेको उनको भनाइ थियो ।
अपि हिमाल गाउँपालिका अध्यक्ष भगतसिंह ठेकरे बोहराले अपि हिमाल सुदूरपश्चिमकै आकर्षक पर्यटकीय गन्तव्यका रूपमा विकास भइरहेको बताए । यसको सम्भावनालाई थप व्यवस्थित र विस्तार गर्न संघ तथा प्रदेश सरकारको सहयोग र निजी क्षेत्रको लगानी आवश्यक रहेको उनले औंल्याए । ‘अपि हिमालको पर्यटन विकास र प्रचारप्रसारका लागि उत्सव आयोजना गरेका हौं । यहाँको सम्भावनालाई व्यवहारमा उतार्न सरकार र निजी क्षेत्रको सहकार्य जरुरी छ,’ उनले भने ।
७ हजार १३२ मिटर अग्लो अपि हिमालको काखमा रहेको आधार शिविर प्राकृतिक सौन्दर्य, हिमशृंखला, जैविक विविधता र साहसिक पदयात्राका लागि सम्भावनायुक्त गन्तव्य हो । अपि–नाम्पा संरक्षण क्षेत्रअन्तर्गत पर्ने यस क्षेत्रमा पिल्कन्द मैदान, कालीढुंगा, रिछार्दे र बयेली ताल, धर्मी गुफा, मार्कण्डेय गुफा, चमेलिया नदीको उद्गमस्थल तथा विशाल हिमाली पाटन पर्यटकीय आकर्षणका रूपमा रहेका छन् ।
वसन्तप्रताप सिंह कान्तिपुरका बझाङ संवाददाता हुन् ।
.png)
