कप्तान रोहित पौडेलले कीर्तिपुरमा टस जितेपछि पोखरालाई ब्याटिङको निम्तो दिएका छन्, जहाँ लुम्बिनी शीर्ष स्थानमा उक्लिने लक्ष्यमा छ।
काठमाडौँ — लुम्बिनी लायन्सले नेपाल प्रिमियर लिग क्रिकेटमा मंगलबारको दोस्रो खेलमा पोखरा एभेन्जर्सविरुद्ध पहिले बलिङ गर्ने भएको छ । लुम्बिनीका कप्तान रोहित पौडेलले त्रिवि अन्तर्राष्ट्रिय क्रिकेट मैदान कीर्तिपुरमा टस जितेर पोखरालाई ब्याटिङको निम्तो दिएका हुन् ।
रोहित पौडेलको कप्तानीमा रहेको लुम्बिनीलाई शीर्ष स्थानमा पुग्ने मौका रहेको छ । लुम्बिनीको २ खेलमा ३ अंक छ । विजय हात पारेमा लुम्बिनीको ५ अंक हुनेछ । विराटनगर किंग्स, कर्णाली याक्स र जनकपुर बोल्ट्सको ४–४ अंक छ ।
पहिलो खेलमा विराटनगर किंग्सलाई पराजित गरेको लुम्बिनीको त्यसपछि चितवन राइनोजसँगको खेल वर्षाका कारण रद्द भएको थियो । पोखरा पहिलो दुवै खेलमा पराजित भएको थियो ।
