निलम्बन हटाउन फिफा र एसियाली फुटबल महासंघ (एएफसी) का उच्च पदाधिकारीहरूसँग 'निर्णायक' वार्ता गर्न शिक्षा तथा खेलकुदमन्त्री सस्मित पोखरेल थाइल्यान्ड जाने भएका छन्।
काठमाडौँ — विश्व फुटबलको सर्वोच्च निकाय (फिफा) ले अखिल नेपाल फुटबल संघ (एन्फा) माथि लगाएको अनिश्चितकालीन निलम्बन फुकुवाका लागि सरकारले उच्चस्तरीय कूटनीतिक पहल तीव्र पारेको छ।
निलम्बन हटाउन फिफा र एसियाली फुटबल महासंघ (एएफसी) का उच्च पदाधिकारीहरूसँग 'निर्णायक' वार्ता गर्न शिक्षा तथा खेलकुदमन्त्री सस्मित पोखरेल थाइल्यान्ड जाने भएका छन्।
आगामी १९ नोभेम्बर मा बैंककमा आयोजना हुने ‘एएफसी अवार्ड्स २०२६’ को अवसर पारेर मन्त्री पोखरेल नेतृत्वको नेपाली टोलीले फिफा र एएफसीको शीर्ष नेतृत्वसँग प्रत्यक्ष वार्ता गर्ने कार्यक्रम तय भएको एन्फा स्रोतले बताएको हो।
तेस्रो पक्षको हस्तक्षेप भएको जनाउँदै फिफाले एन्फालाई अनिश्चितकालका लागि निलम्बित गरेको थियो। त्यसयता नेपाली फुटबल अन्तर्राष्ट्रिय प्रतियोगिता र गतिविधिबाट वञ्चित हुँदै आएको छ।
एन्फा स्रोतका अनुसार यसअघि नेपाल सरकार र फिफाका प्रतिनिधिहरूबीच भर्चुअल माध्यमबाट प्रारम्भिक छलफल भइसकेको छ। सोही संवादको निरन्तरता स्वरूप बैंककमा फेस-टु-फेस निर्णायक वार्ता हुन लागेको हो।
‘एएफसीको निमन्त्रणामा मन्त्रीज्यू बैंकक जान लाग्नुभएको हो। तर, भ्रमणको मुख्य उद्देश्य भनेको फिफा र एएफसीका उच्च पदाधिकारीहरूसँग बसेर एन्फाको निलम्बन फुकुवा गराउनु नै हो,’ एन्फा स्रोतले भन्यो, ‘दुवै निकाय निलम्बन हटाउने विषयमा सकारात्मक रहेकाले यो वार्ताबाट ठोस र सकारात्मक निकास निस्कने अपेक्षा गरेका छौं।’
एएफसीको आधिकारिक निमन्त्रणामा बैंकक जान लागेका मन्त्री पोखरेलले अवार्ड समारोहमा सहभागी हुनुका साथै एसियाली तथा अन्तर्राष्ट्रिय फुटबलका प्रतिनिधिहरूसँग नेपालको फुटबल संकट समाधानका लागि लबिङ गर्नेछन्।
विनयज्योति सापकोटा कान्तिपुर टेलिभिजनका खेलकूद संवाददाता हुन् ।
