श्रामणेरिका भिक्षुणीद्वारा विश्व शान्ति मोन्लम पूजा सम्पन्न

प्रकृति, समस्त प्राणी र मानव समुदायको भलो, रक्षा तथा दीर्घायुको कामना गर्दै मायादेवी मन्दिरमा सोमबार पूजा सम्पन्न गरिएको हो ।

लुम्बिनी — श्रामणेरिका भिक्षुणीद्वारा ३ दिने विश्व शान्ति मोन्लम पूजा गरिएको छ । प्रकृति र सबै प्राणी जगतको भलो र दीर्घायुको कामना गर्दै लुम्बिनीस्थित मायादेवी मन्दिरमा पूजाआजा सोमबार सम्पन्न भएको हो ।

नेपाल बौद्ध लोटस श्रामणेरिका संघद्वारा लुम्बिनीमा दैनिक नौ घण्टा महायानी परम्पराअनुसार पूजा गरिएको थियो ।

बौद्ध दर्शनमा उच्च शिक्षा प्राप्त गरेका खेम्पो उपाधि पाएका नौ जना श्रामणेरिकाले पूजाआजा गराएका थिए । सम्पूर्ण मानवको रक्षा, हित र सुस्वास्थ्यको कामना गर्दै मोन्लम पूजा गरिएको नेपाल बौद्ध लोटस श्रामणेरिका संघकी अध्यक्ष खेन्पो निमाछिरी शेर्पाले बताइन् । ‘यस पटकको पूजा आठौं हो,’ उनले भनिन्, ‘पूजा सुरु गरेयता कोभिड र जेन–जी आन्दोलनका बेला मात्र रोकिएको थियो ।’ पूजामा १०५ जना श्रामणेरिका सहभागी थिए ।

श्रामणेरिका भनेको पूर्णरूपमा दीक्षित हुनुअघिको गृहस्थ जीवन त्यागेर प्रारम्भिक रूपमा बुद्ध धर्मका १० शील अनुसरण गरी लाग्ने महिला भिक्षुणी हुन् ।

मनोज पौडेल लुम्बिनीस्थित कान्तिपुर संवाददाता हुन् ।