टस हारपछि फिल्डिङको निम्तो पाएको जनकपुरले निर्धारित २० ओभरमा ७ विकेट गुमाइ १ सय ४८ रन बनाएको हो ।
काठमाडौँ — तृतराज दासले अर्धशतक बनाएपछि जनकपुर बोल्ट्सले नेपाल प्रिमियर लिग क्रिकेटमा आइतबार पोखरा एभेन्जर्सलाई १ सय ४८ रनको मात्र लक्ष्य दिएको छ । टस हारपछि फिल्डिङको निम्तो पाएको जनकपुरले निर्धारित २० ओभरमा ७ विकेट गुमाइ १ सय ४८ रन बनाएको हो ।
त्रिवि अन्तर्राष्ट्रिय क्रिकेट मैदान कीर्तिपुरमा जनकपुरबाट तृतले ५५ बलमा सवाििधक ६१ रन बनाए । उनी ७ चौका र २ छक्का प्रहार गरी १८ औं ओभरमा माहेदी हसनको बलमा पोखराका कप्तान कुशल भुर्तेलबाट सानदार क्याच आउट भए ।
तृत र मोइन अलीले पावर प्लेको ६ ओभरमा विना क्षति ४५ रन जोडेर जनकपुरलाई उत्कृष्ट सुरुआत दिलाएका थिए । तर सातौं ओभरमा मोइन आउट भएसॅगैं जनकपुरको विकेट पनि झर्न सुरु भएको थियो भने रनमा पनि अंकुश लागेको थियो ।
मोइन २१ रनमा आउट भएका छन् । दुई विश्वकप जितेका इंग्लिस खेलाडी उनी ३ चौका र १ छक्का प्रहार गरी शकिब अल हसनको बलमा बोल्ड भए । बंगलादेशी अलराउन्डर शकिबले उत्कृष्ट बलिङ गरे । आफ्नो ३ ओभरको पहिलो स्पेलमा ४ रनमात्र खर्चेर ३ विकेट लिएका थिए । उनले कुल ४ ओभरमा १५ रन खर्चेर ३ विकेट लिए ।
शकिबले अर्का बंगलादेशका ब्याटर सैफ हसनलाई १ रनमा बोल्ड गरे भने जनकपुरका कप्तान हरमित सिंहलाई ९ रनमा पेभिलियन पठाए । अनिल साहले पनि ९ रनमात्र बनाउन सके । जिम्मी निसमले ११ बलमा ११ रनमात्र बनाउन सके ।
युवा ब्याटर अभिषेक तिवारी ११ बलमा २४ रन बनाई अविजित रहे । उनले १ चौका र २ छक्का प्रहार गरे । अमरसिंह रौटेला इनिङ्सको अन्तिम बलमा २ रनमा बोल्ड भए ।
विनोद पाण्डे कान्तिपुरका खेलकुद ब्यूरो प्रमुख हुन् ।
