बैंकको नाफा ४६ प्रतिशत बढ्यो, कुन बैंकको नाफा कति ?

साउनदेखि असोजसम्ममा २० वटा वाणिज्य बैंकले १९ अर्ब ७ करोड रुपैयाँ खुद नाफा कमाएका छन् । गत वर्षको पहिलो त्रैमासको तुलनामा यस वर्षको सोही अवधिमा बैंकको नाफा ४६.१३ प्रतिशतले बढेको छ ।

काठमाडौँ — चालु आर्थिक वर्षको पहिलो त्रैमास (साउनदेखि असोजसम्म) मा २० वटा वाणिज्य बैंकले १९ अर्ब ७ करोड रुपैयाँ खुद नाफा कमाएका छन् । गत वर्षको पहिलो त्रैमासको तुलनामा यस वर्षको सोही अवधिमा बैंकको नाफा ४६.१३ प्रतिशतले बढेको छ । यो अवधिमा पुरानो ऋण असुली भएपछि बैंकहरूले यसअघि निष्क्रिय कर्जाका लागि राखेको नोक्सानी व्यवस्था (प्रोभिजन) उच्च दरले घटाएका छन् । यही कारण बैंकको नाफामा उच्च सुधार देखिएको हो । गत वर्षको पहिलो त्रैमासमा बैंकहरूले कुल १३ अर्ब ५ करोड नाफा कमाएका थिए ।

सञ्चालनमा रहेका २० वाणिज्य बैंकको नाफा ४६.१३ प्रतिशतले बढेको छ । बैंकहरूले सार्वजनिक गरेको चालु आर्थिक वर्ष २०८३–८४ को पहिलो त्रैमाससम्मको अपरिष्कृत वित्तीय विवरणले यस्तो देखाएको हो ।

बैंकहरूको व्यवसायको मुख्य आधार मानिने खुद ब्याज आम्दानी भने एक प्रतिशतले मात्रै वृद्धि भएको छ । यस्तो आम्दानी ४९ अर्ब १० करोड रुपैयाँबाट बढेर ४९ अर्ब ५७ करोड पुगेको हो ।

बैंकहरूको व्यवसाय विस्तारभन्दा असुली र पुराना कर्जामा सुधार हुँदै जाँदा नाफा बढ्न सकेको देखिन्छ ।