नाफा बढेपछि सोल्टीको सेयर मूल्य बढ्यो , समूहगत सूचकमा सुधार

सोल्टी होटेलको नाफा १५.२० प्रतिशतले बढेर १४ करोड २३ लाख रुपैयाँ पुगेको छ ।

काठमाडौँ — शुक्रबार समग्र बजार सूचक नेप्से ६ अंकले घट्यो । कारोबारमा आएका समूहहरूमध्ये होटेल समूहको परिसूचक भने शुक्रबार अधिकांश समय बढ्यो । यो समूह बजार बन्द हुँदा १७ अंकले बढेर ७०३३ विन्दुमा पुग्यो ।

यो समूहलाई बढाउन सोल्टी होटेलले मुख्य भूमिका खेल्यो । यद्यपि, कारोबारको अन्त्यमा बन्दीपुर केबलकारको मूल्य पनि बढ्यो ।

होटेलको सेयर मूल्य ५ रूपैयाँले बढेर ५५० रूपैयाँमा कारोबार भएको छ । सोल्टी होटेलको सेयर मूल्य बढ्नुको मुख्य कारण यसको वित्तीय विवरण सार्वजनिक हुनु हो ।

सोल्टी होटेलको चालु आर्थिक वर्ष २०८३-८४ को पहिलो त्रैमासमा नाफा १५.२० प्रतिशतले बढेर १४ करोड २३ लाख रुपैयाँ पुगेको छ । यसअघि यही अवधिमा यस्तो नाफा १२ करोड ३५ लाख रुपैयाँ थियो ।

यसको सेवा बिक्रीबाट भएको आम्दानी पनि १४ प्रतिशतभन्दा धेरैले बढेको छ । यस्तो आम्दानी ६२ करोड रुपैयाँबाट बढेर ७२ करोड रुपैयाँ पुगेको हो ।

होटेलले गत आर्थिक वर्ष २०८२-८३ का लागि लाभांश घोषणा गरिसकेको छैन । त्यसअघि यसले ३१ प्रतिशत लाभांश दिएको थियो ।