फेटा गाउँपालिका–३ मा १५ शय्याको अस्पताल उद्घाटनलाई लिएर झडप हुँदा लाठीचार्ज र गोली चलेको स्थानीयको आरोप छ भने प्रहरीले पुष्टि गरेको छैन।
बारा — बाराको फेटा गाउँपालिका–३ मा नवनिर्मित १५ शय्याको अस्पताल भवन उद्घाटन गर्ने विषयमा शनिबार दुई पक्षबीच तनाव हुँदा प्रहरीले चलाएको गोली लागेर एक जना घाइते भएका छन् । प्रहरीको लाठीचार्जले स्थानीय ५५ वर्षीय लालबाबू साहको टाउकोमा चोट लागेको छ । उनीसहित कयौँ घाइते भएका छन् ।
पूर्ववडाध्यक्ष जयप्रकाश दासका अनुसार उद्घाटनका लागि टेन्ट बनाउने फेटा–३ का १८ वर्षीय धर्मेन्द्र पासवानका छोरा आदित्यको पेटमा गोली लागेको छ । घाइते उनलाई वीरगन्जको नारायणी अस्पतालमा उपचारका लागि लगिएको छ । तर प्रहरीले भने गोली कसलाई लागेको र कति गोली चलेको हो भन्ने पुष्टि गरेको छैन । घटनास्थलमा व्यापक प्रहरी परिचालन गरिएको छ ।
नयाँ अस्पताल भवन उद्घाटनका लागि गाउँपालिका अध्यक्ष रुस्तम अंसारीले रास्वपाकी नेतृ समीक्षा बास्कोटालाई आमन्त्रण गरेका थिए । उद्घाटन १ बजेका लागि राखिएको थियो । तर पालिका अध्यक्षको उक्त तयारी र अस्पतालमा उपचार सेवा दिन स्रोतसाधन र जनशक्ति नभएकै अवस्थामा हतारमा आफ्नो नाम शिलालेखमा राख्न उद्घाटन गर्न लागेको भन्दै पालिकाका विपक्षी स्थानीयले विरोध गरेपछि दुवै पक्षबीच झडपसहित तनाव भएको पूर्ववडाध्यक्ष दासले बताए ।
शिलालेख फुटाइएको छ । तनाव र झडपका क्रममा स्थानीयका दर्जनभन्दा बढी मोटरसाइकल जलाइएका छन् । टेन्ट तोडफोड गरिएको छ । अस्पतालमा झ्यालढोका फुटाइएको छ ।
घाइते लालबाबु साहका अनुसार पानी परिरहेका बेला पानीबाट जोगिन स्थानीयको भीड अस्पताल भवनमा ओत लाग्न खोज्दा प्रहरीले लाठीचार्ज गरेपछि झडप भएको हो । त्यसपछि प्रहरीले गोली चलाएको उनले बताए । घटनास्थलमा सुरक्षा बल परिचालन गरिएको छ ।
