घाइतेहरूको वीरगन्ज–१४ गण्डकस्थित हेल्थकेयर अस्पतालमा उपचार भइरहँदा गाउँबाट पुगेका कार्यकर्ताबीच अस्पतालमै फेरि झडप हुन थालेपछि वीरगन्जको इलाका प्रहरी कार्यालय श्रीपुरले नौ जनालाई नियन्त्रणमा लिएको छ ।
बारा — जितपुरसिमरा उपमहानगरपालिका–२३ भलुही गाउँमा रास्वपा सांसद रहबर अंसारी सहभागी चियापान कार्यक्रमपछि बिहीबार पार्टीकै दुई पक्षका कार्यकर्ताबीच झडप हुँदा दुवै पक्षका १० जनाभन्दा बढी कार्यकर्ता घाइते भएका छन् ।
निर्वाचन क्षेत्र नम्बर ४ मा पर्ने उक्त गाउँमा छठतिहारको अवसर पारेर रास्वपाले सोही निर्वाचन क्षेत्रबाट प्रत्यक्षतर्फ निर्वाचित प्रतिनिधिसभा सदस्य (सांसद) अंसारीको प्रमुख आतिथ्यमा चियापान कार्यक्रम आयोजना गरेको थियो । चियापान कार्यक्रमपछि पार्टीभित्रैका सोही वडाका पूर्ववडाध्यक्षसमेत रहेका रास्वपा कार्यकर्ता असलम देवान र अर्का कार्यकर्ता सुवास मंसुरी पक्षीय कार्यकर्ताबीच व्यक्तिगत रिसइबीका कारण एकअर्कालाई आरोप–प्रत्यारोप लगाएपछि झडप भएको इलाका प्रहरी कार्यालय सिमराका प्रहरी नायब निरीक्षक दयाकृष्ण भट्टले बताए ।
'कार्यक्रम सकेपछि माननीयज्यू हिँडिसकेपछि गाउँमा कार्यकर्ताबीच गुटबन्दी भएर दोहोरो भनाभनपछि झडप हुँदा तनाव भएको हो,' उनले बताए ।
उनका अनुसार झडप नियन्त्रण गर्ने क्रममा स्थानीयको आक्रोशित भीडबाट प्रहरी सहायक निरीक्षक भाग्यनारायण यादवसमेत सामान्य घाइते भएका छन् । कार्यकर्ताबीच झडपपछि तनाव हुँदा सांसद अंसारी कार्यक्रमस्थलबाट पहिले नै निस्किए पनि कार्यकर्ताबीच भनाभन भने चियापान कार्यक्रमबाटै सुरु भएको उनको भनाइ छ । गाउँमा दुई समूहमा कार्यकर्ता बाँडिएपछि झडप भएको उनले बताए । तनाव व्यवस्थापन गर्ने क्रममा प्रहरीसँग समेत कार्यकर्ताको धकेलाधकेल भएको थियो ।
त्यसपछि सिमरा प्रहरीले पाँच जनालाई नियन्त्रणमा लिएको हो । उनीहरूलाई नियन्त्रणमा लिएर अनुसन्धान भइरहेको प्रहरी नायब उपरीक्षक भट्टले बताए ।
उता, घाइतेहरूको वीरगन्ज–१४ गण्डकस्थित हेल्थकेयर अस्पतालमा उपचार भइरहँदा गाउँबाट पुगेका कार्यकर्ताबीच अस्पतालमै फेरि झडप हुन थालेपछि वीरगन्जको इलाका प्रहरी कार्यालय श्रीपुरले नौ जनालाई नियन्त्रणमा लिएको छ । उनीहरूलाई वीरगन्जको श्रीपुर इलाका प्रहरी कार्यालयमा राखिएको छ ।
झडपमा घाइते सात जनाको वीरगन्जस्थित हेल्थकेयर र अन्यको स्थानीय अस्पतालमा उपचार भइरहेको छ । घाइतेहरूलाई हेल्मेटले समेत चोट लागेको छ । उनीहरूको टाउकोलगायत शरीरका अन्य भागमा चोटपटक लागेको छ ।
घटनाबारे सांसद अंसारीसँग प्रतिक्रिया लिन खोज्दा उनी सम्पर्कमा आउन चाहेनन् ।
लक्ष्मी साह कान्तिपुरका बारा संवाददाता हुन् ।
