शनिबार सम्पन्न प्रतियोगितामा मुकेशले १६ मिनेट पाँच सेकेन्ड र सिर्जनाले २० मिनेट १९ सेकेन्डमा दूरी पूरा गरे।
चितवन — नाराययागढमा शनिबार सम्पन्न पाँच हजार मिटरको ‘राइनो दौड’ प्रतियोगितामा मुकेश पाल र सिर्जना पाण्डे विजेता भएका छन् ।
मुकेशले खुला तर्फ उक्त दुरी १६ मिनेट पाँच सेकेन्डमा पार गरे । महिलातर्फ सिर्जनाले २० मिनेट १९ सेकेन्डमा पुरा गरिन् । विजेताले १५ हजार रुपैयाँ नगद प्राप्त गरेका छन् । चितवनको पुरानो संस्था राइनो क्लबले प्रतियोगिता आयोजना गरेको हो ।
खुलातर्फ उमेश थापा दोस्रो र दिशराज लिम्बु तेस्रो भए । थापाले १६ मिनेट १४ सेकेन्ड र लिम्बुले १६ मिनेट १५ सेकेन्डमा उक्त दुरी पार गरेका थिए । महिला तर्फ सरस्वर्ती भट्टराई दोस्रो र हिमाली बुढा तेस्रो भइन् ।
सरस्वतीले २१ मिनेट २५ समेन्ड र हिमालीले २२ मिनेट ३९ सेकेन्ड लगाएर पाँच किलो मिटर पुरा गरेका थिए । दोस्रो हुनेले १० हजार रुपैयाँ र तेस्रो हुनेले पाँच हजार रुपैयाँ पुरस्कार पाए ।
बागमती प्रदेशका स्वास्थ्य तथा सामाजिक विकास मन्त्री गिरबहादुर लामा तामाङले विजयीहरुलाई पुरस्कार वितरण गरे । सो क्रममा उनले खेलकुदले व्यक्तिलाई स्वास्थ्य राख्नुका साथै समाजलाई पनि सक्रिय बनाउने बताए । ‘व्यक्तिको स्वास्थ्य राम्रो हुने मात्रै हैन खेलकुदले समाजलाई सक्रिय र एकतावद्ध बनाउँछ । आर्थिक गतिविधिमा सकारात्मक प्रभाव पार्दछ,’ मन्त्री लामाले भने ।
नवलपरासी (बर्दघाट सुस्ता पूर्व)को गैंडाकोट जयश्री पुल नजिकबाट सुरु भएको दौड नारायणगढ लिलाचोकमा आएर समापन भएको थियो । २०३६ सालमा स्थापना भएको राइनो क्लबले यसअघि १० पटकसम्म दौड प्रतियोगिता राखेको क्लबका अध्यक्ष पुष्पलाल श्रेष्ठले बताए । कार्यक्रमका संयोजक महेश प्रधानले प्रतियोगितामा देशभरबाट एक सय पुरुष र १९ महिला सहभागी भएको जानकारी दिए ।
रमेशकुमार पौडेल कान्तिपुरका चितवन संवाददाता हुन् । उनी दुई दशकदेखि पत्रकारिता गरिरहेका छन् ।
