बागचौरको मोख्ला बजारबाट माथिल्नो मोख्ला जाँदै गरेको अटो अनियन्त्रित भएर गएराति दुर्घटनामा परेको थियो ।
सल्यान — सल्यानमा अटो दुर्घटना हुँदा एकको मृत्यु भएको छ भने एकजना घाइते भएका छन् ।जिल्लाको बागचौर नगरपालिका-१० मोख्ला बजारबाट माथिल्नो मोख्ला जाँदै गरेको रा १ ह ६१२६ नम्बरको अटो भित्री सडक खण्डमा दुर्घटना हुँदा सवार छत्रेश्वरी गाउँपालिका-५ का वर्ष ३५ का रेशम रावतको मृत्यु भएको हो भने अटो चालक मोख्ला निवासी वर्ष ३४ का निर्मल कवर मगर घाइते भएका हुन् ।
जिल्ला प्रहरी कार्यालय सल्यानका सूचना अधिकारी प्रहरी निरीक्षक ईश्वर रोकायका अनुसार अटो अनियन्त्रित भएर गए राति १ बजे दुर्घटनामा परेको थियो । रेशम रावतको घटनास्थलमै मृत्यु भएको उनले जानकारी गराए ।घाइते निर्मल कवर मगरको राप्ती स्वास्थ्य विज्ञान प्रतिष्ठान दाङमा उपचार भइरहेको उनको भनाइ छ ।
अटो सडकदेखि ५५ मिटर तल खसेको थियो । अटोमा दुई जना मात्र सवार थिए । घटनास्थल पुगेको इलाका प्रहरी कार्यालय थरमारेको टोली घटनास्थलमा पुगेर घटनाको अनुसन्धान गरी मृतकको शव पोष्टमार्टमका लागि जिल्ला अस्पताल सल्यान पठाएको उनको भनाइ छ ।
विप्लव महर्जन कान्तिपुरका सल्यान संवाददाता हुन् ।
