स्पेन रेल दुर्घटना : मृत्यु हुनेको संख्या  ६८ पुग्यो

म्याड्रिडबाट दक्षिणमा भएको दुर्घटनामा रेलका डिब्बा भिरालो भागमा खसेपछि यात्रुहरूले भयावह दृश्य भोगेका छन्।

काठमाडौँ — स्पेनको मध्य भागमा बुधबार बिहान दुई तीव्र गतिको रेल एकआपसमा ठोक्किँदा  मृत्यु हुनेको संख्या ६८ पुगेको  छ । दुर्घटनामा दर्जनौँ घाइते भएका छन् ।

बीबीसी का अनुसार म्याड्रिडबाट सेभिलतर्फ गइरहेको रेल लिकमा रोकिराखिएको अर्को रेलसँग ठोक्किएको थियो । ठक्करपछि रेलका केही डिब्बा लिकबाट खसेर भिरालो भागमा पुगेका थिए ।

स्पेनका यातायातमन्त्री ओस्कार पुएन्तेका अनुसार कम्प्युटर प्रणालीमा आएको खराबी र त्यसपछि भएको मानवीय त्रुटिका कारण दुर्घटना भएको हो । यो पछिल्लो १३ वर्षमा स्पेनमा भएको सबैभन्दा घातक रेल दुर्घटना हो ।

बुधबार बिहान ९ बजेपछि म्याड्रिडबाट करिब १४० किलोमिटर दक्षिणमा मोरा र ओर्गाज नगरपालिकाबीच दुर्घटना भएको थियो । निजी रेल सञ्चालक कम्पनी इरियोले सञ्चालन गरेको रेलमा १४७ यात्रु सवार थिए । कम्प्युटर प्रणालीमा खराबी आएपछि उक्त रेल रोकिएको थियो ।

यातायातमन्त्री पुएन्तेका अनुसार प्रणालीमा खराबी आएपछि म्याड्रिडस्थित २४ घण्टा सञ्चालन हुने नियन्त्रण केन्द्रले रेल सञ्चालनको जिम्मेवारी लिने व्यवस्था छ । तर, उक्त केन्द्रले गति सीमा नतोकी रेलहरूलाई पुनः चलाउन निर्देशन दिएको उनले बताए । उनले त्यस निर्णयलाई 'अस्पष्ट' भनेका छन् ।

इरियोले आफ्नो रेललाई सरकारी रेल कम्पनी रेन्फेले सञ्चालन गरेको अर्को रेलले पछाडिबाट ठक्कर दिएको जनाएको छ । रेन्फेको रेलमा ३९७ यात्रु सवार थिए ।

दुर्घटनामा बाँच्न सफल यात्रुहरूले रेलभित्रको अवस्था भयावह रहेको बताएका छन् । ठक्करका कारण यात्रुहरू उछिट्टिएको, केही भग्नावशेषमा च्यापिएको र बाहिर निस्कन झ्याल फुटाउनुपरेको उनीहरूले बताएका छन् ।

रेन्फेको रेलमा सवार ६२ वर्षीय साल्भाडोर अरिजाले ठक्करको प्रभाव 'भयानक' रहेको रोयटर्सलाई बताए । उनका अनुसार केही यात्रु सिटबीच च्यापिएकाले चल्नसमेत सकिरहेका थिएनन् ।

दुर्घटनापछि रेलका एउटा डिब्बामा आगलागी भएको थियो । यात्रुहरूले भग्नावशेषमा च्यापिएका मानिसहरू गुहार मागिरहेको र केही भग्नावशेषमुनि पुरिएको बताएका छन् । दुर्घटनास्थलका तस्बिरमा रेलको लिकको लामो टुक्रा एउटा डिब्बाभित्र छिरेको देखिन्छ ।