जिल्ला अदालत ललितपुरका न्यायाधीश हरिसिंह धामीको इजलासले एन्फाका अध्यक्ष पंकजविक्रम नेम्वाङ र महासचिव किरण राईलाई ५/५ लाख धरौटी लिएर छाड्न आदेश दिएको थियो ।
काठमाडौँ — जिल्ला अदालत ललितपुरले अखिल नेपाल फुटबल संघ (एन्फा)का अध्यक्ष पंकजविक्रम नेम्वाङ र महासचिव किरण राईलाई धरौटीमा रिहा गर्ने आदेश गरेपछि उनीहरू छुटेका छन् ।
अदालतमा उपस्थित भएका दुवै जनाको बयानपछि भएको थुनछेक बहसमा जिल्ला अदालतले जनही ५ लाख धरौटी माग गरेको थियो । न्यायाधीश हरिसिंह धामीको इजलासले उनीहरूलाई ५/५ लाख धरौटी लिएर छाड्न आदेश दिएको हो ।
प्रहरीको केन्द्रीय अनुसन्धान ब्युरो (सीआईबी)ले उनीहरूविरुद्ध एन्फाको अनियमितता सम्बन्धमा अनुसन्धान गरेपछि मुद्दा दायर गरेको थियो ।
अदालतमा मुद्दा दायर हुँदा उनीहरू फरार थिए । उनीहरू बुधबार अदालतमा उपस्थित भएका थिए । लगत्तै उनीहरूको बयान गरिएको थियो भने आजै बहस हुँदै धरौटी मागिएको थियो ।
