ब्राजिलको सर्वोच्च अदालतले भन्यो,' बोल्सोनारोविरुद्ध कुनै पनि प्रहरी कारबाही गरिएको छैन'

सर्वोच्च अदालतले जारी गरेको विज्ञप्तिमा भनिएको छ, 'सिनेटर फ्लाभियो बोल्सोनारो वा उनका ठेगानाहरूलाई लक्षित गरेर कुनै पनि खानतलासी तथा जफतको वारेन्ट जारी गरिएको वा कार्यान्वयनमा ल्याइएको भन्ने समाचारमा कुनै सत्यता छैन, यो पूर्ण रूपमा अफवाह हो।'

काठमाडौँ — ब्राजिलको सर्वोच्च अदालतले बुधबार एक विज्ञप्ति जारी गर्दै सिनेटर फ्लाभियो बोल्सोनारोविरुद्ध कुनै पनि किसिमको प्रहरी कारबाही नगरिएको र खानतलासी तथा जफतको वारेन्ट जारी नगरिएको स्पष्ट पारेको छ।

यसअघि ब्राजिलको चर्चित समाचारमाध्यम 'जी वान' ले बुधबार बिहान संघीय प्रहरीले राजधानी ब्रासिलियास्थित फ्लाभियोको घरमा खानतलासी तथा जफतको वारेन्ट तामिल गरेको समाचार प्रकाशित गरेको थियो ।

सर्वोच्च अदालतले सम्पत्ती शुद्धीकरणसम्बन्धी अनुसन्धानका क्रममा राहदानी बुझाउन दिएको आदेश पालना नगरेपछि प्रहरीले उनको खोजी गरिरहेको समाचारमा उल्लेख थियो ।

उक्त समाचार खण्डन गर्दै सर्वोच्च अदालतले जारी गरेको विज्ञप्तिमा भनिएको छ, 'सिनेटर फ्लाभियो बोल्सोनारो वा उनका ठेगानाहरूलाई लक्षित गरेर कुनै पनि खानतलासी तथा जफतको वारेन्ट जारी गरिएको वा कार्यान्वयनमा ल्याइएको भन्ने  समाचारमा कुनै सत्यता छैन, यो पूर्ण रूपमा अफवाह हो।'

राष्ट्रपतीय निर्वाचनमा पराजित भएका बोल्सोनारो बुधबार अमेरिका पुगेको विभिन्‍न स्रोतहरुले बताएका छन् । अमेरिकी राष्ट्रपति डोनल्ड ट्रम्पको प्रशासनले फ्लाभियो, उनकी पत्नी र दुई छोरीलाई भिसा दिने एक अमेरिकी अधिकारीले बताएका छन्। यद्यपि उनी कहाँ छन् भन्ने तत्काल स्पष्ट भएको छैन। परिवारनिकट एक स्रोतले उनी फ्लोरिडा पुगेको बताएको छ।

आइतबार भएको निर्वाचनमा फ्लाभियोले वामपन्थी राष्ट्रपति लुइज इनासियो लुला दा सिल्भासँग पराजय बेहोरेका थिए।