'अर्नब' चक्रवातको प्रभाव - लुम्बिनीका ७ जिल्लामा उच्च सतर्कता अपनाउन आग्रह

अर्नब चक्रवातको प्रभावले लुम्बिनी प्रदेशका सात जिल्ला बढी प्रभावित हुने पूर्वानुमान गरिएको छ ।

बङ्गालको खाडीबाट उत्पन्न भई भारतीय भूमि हुँदै आएको 'अर्नब' चक्रवातका कारण लुम्बिनी प्रदेशका अर्घाखाँची, पाल्पा, कपिलवस्तु, प्युठान, रुकुम पूर्व, रोल्पा र नवलपरासी पश्चिम बढी प्रभावित हुने प्रदेश सरकारले जनाएको छ । जल तथा मौसम विज्ञान विभागको विशेष बुलेटिनलाई आधार मान्दै प्रदेश सरकारको आन्तरिक मामिला, कानुन तथा यातायात मन्त्रालयले यही कात्तिक १३ र १४ गते यी जिल्लाहरूमा उच्च सतर्कता अपनाउन सार्वजनिक सूचना जारी गरेको छ।

यस अवधिमा मेघगर्जन, चट्याङ र हावाहुरीसहित मध्यमदेखि भारी वर्षा हुने तथा नदीनालामा पानीको सतह बढेर सडक र हवाई यातायात समेत प्रभावित हुन सक्ने भन्दै मन्त्रालयले विशेष अपिल गरेको छ। सम्भावित क्षति न्यूनीकरणका लागि किसानहरूलाई कात्तिक १२ गतेभन्दा अगावै धानबाली काटिसक्न र भित्र्याउन, उच्च पहाडी तथा हिमाली क्षेत्रमा यात्रा नगर्न र अति आवश्यक पर्दाबाहेक घरबाहिर ननिस्कन अनुरोध गरिएको छ। साथै, नदी किनारका बासिन्दालाई सुरक्षित रहन, स्थानीय प्रशासन र सुरक्षा निकायलाई सम्भावित जोखिमयुक्त क्षेत्रका बासिन्दालाई समयमै सुरक्षित स्थानमा सार्न, उद्धारका लागि तयारी अवस्थामा बस्न र आवश्यकताअनुसार यातायात आवागमनमा रोक लगाउने व्यवस्था मिलाउन निर्देशन दिइएको छ।