लुम्बिनी बचाउ महाअभियानका संयोजक अक्रम खान रिहा

आन्दोलनको स्वरुप परिवर्तन गर्ने र पुत्लालगायत आगजनीका कार्यक्रम नगर्ने शर्तमा मंगलबार उनी दिउँसो रिहा भएका हुन् ।

भैरहवा — लुम्बिनी विकास कोष उपाध्यक्षमा आनी छोइङ डोल्माको नियुक्तिको विरोध प्रदर्शनका क्रममा सोमबार राति पक्राउ परेका लुम्बिनी बचाउ महाअभियानका संयोजक अक्रम खान रिहा भएका छन् ।

आन्दोलनको स्वरुप परिवर्तन गर्ने र पुत्लालगायत आगजनीका कार्यक्रम नगर्ने शर्तमा मंगलबार उनी दिउँसो रिहा भएका हुन् । रिहा भएलगत्तै खानले शान्तिपूर्ण विरोधका कार्यक्रम जारी राख्ने उनले बताएका छन् । ‘हाम्रो अनुरोध नमानेका कारण पर्यटनमन्त्रीको पुत्ला जलाएका हौं,’ खानले भने, ‘आगामी दिनमा आगजनीका कार्यक्रम नगर्ने कागज गराएर प्रहरीले छाडेको हो ।’

आफ्ना भाईको रोहबरमा प्रहरीले रिहा गरेको उनले बताए । उनीसँगै पक्राउ परेका अर्का अभियन्ता बाजिउद्दिन मुसलमान पनि रिहा भएका छन् ।

उनीहरू पक्राउ परेपछि रास्वपा सांसद तौफिक खान र कन्हैया बनियाँले उनको रिहाइका लागि पहल गरेका थिए । प्रहरीले पनि मन्त्रीको पुत्ला जलाएपछि नियन्त्रणमा लिनु परेको जनाएको थियो ।

जिल्ला प्रहरीका अनुसार सोमबार राति साढे १० बजे मन्त्रीको पुत्ला जलाउने  महाअभियानका अध्यक्ष लुम्बिनी सांस्कृतिक नगरपालिका–६, बासिन्दा खान र लुम्बिनी साँस्कृतिक– ९  पिपराका मुसलमानलाई नियन्त्रणमा लिइएको जनाएको थियो ।

इलाका प्रहरी कार्यालय लुम्बिनीबाट प्रहरी निरीक्षक होमनाथ रेग्मीको नेतृत्वमा खटिएको प्रहरी टोलीले उनीहरूलाई  नियन्त्रणमा लिई थप अनुसन्धानका लागि जिल्ला प्रहरी कार्यालय रुपन्देहीमा पठाएको थियो ।