श्रीमतीमाथि खुकुरी प्रहार गरेपछि फरार रहेका डम्बरको खोजीका लागि प्रहरी परिचालन गरिएको प्रहरी निरीक्षक पाण्डव राजवंशीले बताए ।
काठमाडौँ — धनकुटामा एक व्यक्तिले खुकुरी प्रहार गरी श्रीमतीलाई गम्भीर घाइते बनाएका छन्। धनकुटा नगरपालिका–६ पाङसिङ टोलका डम्बर कार्कीले आफ्नी श्रीमती तारा कार्कीमाथि खुकुरी प्रहार गरेका हुन्।
जिल्ला प्रहरी कार्यालय धनकुटाका प्रहरी निरीक्षक पाण्डव राजवंशीका अनुसार घटना मंगलबार दिउँसो करिब १२ बजे भएको हो। वडाध्यक्ष मिलनकुमार खड्गीले घटनालगत्तै घाइते तारालाई उपचारका लागि जिल्ला अस्पताल धनकुटा लगिएको र त्यहाँ उपचार सम्भव नभएपछि थप उपचारका लागि धरानस्थित बीपी कोइराला स्वास्थ्य विज्ञान प्रतिष्ठान रेफर गरिएको बताए। उनले खुकुरी प्रहारबाट ताराको टाउको र ढाडमा गम्भीर चोट लागेको र देब्रे हातको कान्छी औँला छिनिएको बताए।
वडाध्यक्ष खड्गीका अनुसार डम्बर १३ वर्षदेखि बेपत्ता थिए। केही दिनअघि मात्रै परिवारका सदस्यले खोजेर उनलाई घर ल्याएका थिए। घर फर्किएदेखि नै उनले श्रीमतीमाथि हिंसा गर्ने र मार्ने धम्की दिने गरेको स्थानीयले बताएका छन्। स्थानीयका अनुसार उनले यसअघि पनि अत्यधिक मादक पदार्थ सेवन गरी श्रीमतीलाई धम्क्याउने गरेका थिए।
श्रीमतीमाथि खुकुरी प्रहार गरेपछि फरार रहेका डम्बरको खोजीका लागि प्रहरी परिचालन गरिएको प्रहरी निरीक्षक राजवंशीले बताए।
विनोद घिमिरे कान्तिपुर संवाददाता हुन्।
