नेपालगन्ज स्वीमिङ क्लबको आयोजनामा यही कात्तिक १४ र १५ गते नेपालगन्ज रंगशालामा प्रतियोगिता हुन लागेको हो । प्रतियोगितामा झन्डै २०० खेलाडीले प्रतिस्पर्धा गर्नेछन् ।
नेपालगन्ज — बाँकेको नेपालगन्जमा तेस्रो नेपालगन्ज अन्तर्राष्ट्रिय स्वीमिङ च्याम्पियनसिप आयोजना हुने भएको छ । सोमबार पत्रकार सम्मेलनको आयोजना गरी नेपालगन्ज स्वीमिङ क्लबको आयोजनामा यही कात्तिक १४ र १५ गते नेपालगन्ज रंगशालामा प्रतियोगिता हुन लागेको जानकारी गराइएको हो ।
नेपाल स्वीमिङ एसोसिएसनसँगको सहकार्यमा आयोजना हुने प्रतियोगितामा भारतको लखनउ, दिल्ली र पञ्जाबबाट समेत खेलाडी सहभागी हुने क्लबले जनाएको छ । प्रतियोगितामा भारतबाट करिब ५० जना र नेपालगन्जसहित देशका विभिन्न स्थानबाट करिब १५० जना गरी झन्डै २०० खेलाडीले प्रतिस्पर्धा गर्नेछन् ।
क्लबले स्थापनाकालदेखि नै नियमित रूपमा राष्ट्रियस्तरका स्वीमिङ प्रतियोगिता आयोजना गर्दै आएको छ । पहिलो र दोस्रो संस्करण सफलतापूर्वक सम्पन्न भएपछि तेस्रो संस्करणका रूपमा अन्तर्राष्ट्रियस्तरको प्रतियोगिता आयोजना गर्न लागिएको क्लबका अध्यक्ष केशव न्यौपानेले जानकारी दिए ।
प्रतियोगिताले नेपालगन्जमा पौडी खेलको विकास, खेलाडीको क्षमता अभिवृद्धि तथा राष्ट्रिय र अन्तर्राष्ट्रियस्तरमा खेल पर्यटन प्रवर्द्धन गर्न सहयोग पुग्ने उनले बताए ।
प्रतियोगितामा ८ वर्षमुनिदेखि १७ वर्षसम्मका विभिन्न उमेर समूहका खेलाडी तथा १७ वर्षभन्दा माथिका खुला समूहका खेलाडीले प्रतिस्पर्धा गर्नेछन् । खेलाडीहरूले फ्रिस्टाइल, ब्याकस्ट्रोक, ब्रेस्टस्ट्रोक, बटरफ्लाई, रिले र व्यक्तिगत मेडले विधामा प्रतिस्पर्धा गर्नेछन् । प्रतियोगितामा विभिन्न विधाका ८० वटा इभेन्ट सञ्चालन गरिने क्लबका उपाध्यक्ष एवम् इभेन्ट म्यानेजर सूर्यमणि अधिकारीले जानकारी दिए ।
नेपालगन्जका खेलाडीलाई प्रतियोगिताका लागि तयार पार्न स्वीमिङ प्रशिक्षकद्वय चन्दुमान चौधरी र दीपक परियारले होटल सिद्धार्थको स्वीमिङ पुलमा नियमित प्रशिक्षण दिँदै आएका छन् ।
प्रतियोगिता सफल बनाउन लुम्बिनी प्रदेश खेलकुद परिषद्, नेपालगन्ज उपमहानगरपालिका र कोहलपुर नगरपालिकाले आर्थिक सहयोग गर्ने प्रतिबद्धता जनाएका छन् । त्यसैगरी, नेपालगन्ज उपमहानगरपालिकाका वडा नं. ६, १२ र १८ तथा जानकी गाउँपालिका वडा नं. ३ लगायतका निकायबाट पनि सहयोग हुने क्लबले जनाएको छ ।
प्रतियोगितामा सहभागी खेलाडीलाई आयोजकले नेपालगन्जका स्वीमिङ पुल भएका चारतारे स्तरका होटलमा निःशुल्क बसोबास तथा खानाको व्यवस्था गर्ने जनाएको छ । प्रतियोगिता सञ्चालन गर्न करिब ३५ लाख रुपैयाँ खर्च हुने अनुमान गरिएको छ ।
रुपा गहतराज कान्तिपुरकी बाँके संवाददाता हुन् ।
(65).jpg)
