पालुङटार माझथोकका भीमबहादुर घिमिरेको घरबाट ३३ सय रुपैयाँ नगद र सुनको नौगेडी चोरी भएको प्रहरीले जनाएको छ ।
गोरखा — गोरखामा एकै दिन ६ ठाउँमा चोरीका घटना भएका छन् । शुक्रबार घरमा कोही नभएको मौका छोपी नगद र सुनका गरगहना चोरी भएको भन्दै प्रहरीमा निवेदन परेको छ ।
पालुङटार माझथोकका भीमबहादुर घिमिरेको घरबाट ३३ सय रुपैयाँ नगद र सुनको नौगेडी चोरी भएको प्रहरीले जनाएको छ । सोही ठाउँकी अञ्जना घिमिरेको घरबाट २२ हजार रुपैयाँ नगद र खुत्रुके चोरी भएको छ । पालुङटार लामाटाका सरस्वती थापाको घरबाट ३ हजार रुपैयाँ नगद र नक्कली सुनको नौगेडी चोरी भएको भन्दै घरधनीले प्रहरीलाई जानकारी गराएका छन् ।
गोरखा रातमाटेका अनिता थापाको घरबाट एक थान सुनको औंठी र कानमा लगाउने एक जोर रिङ तथा शहीद लखनकी शान्ति श्रेष्ठको घरबाट एक तोलाको नौगेडी पोते र ४० हजार रुपैयाँ नगद चोरी भएको भन्दै प्रहरीलाई खबर गरिएको छ । पालुङटारका ईश्वर नेपालीको घरबाट पनि आधा तोलाको सुनको औंठी र ७० हजार रुपैयाँ नगद चोरी भएको उजुरी प्रहरीमा परेको छ ।
छवटै चोरीका घटना शुक्रबार दिउँसो भएको जिल्ला प्रहरी कार्यालय गोरखाका प्रमुख एसपी अनिलकुमार खड्काले बताए । ‘चोरी एकै व्यक्तिबाट भएको जस्तो देखिन्छ । छवटै घरमा मान्छे नभएको र ताल्चा लगाइएका घर फोडेर नगद तथा सुनका गरगहना चोरी भएको देखिन्छ,’ उनले भने, ‘घटनामा संलग्नको खोजी तीव्र पारेका छौं ।’ चोरीका घटना बढेपछि सुरक्षा गस्ती बढाएको र सादा पोसाकका प्रहरी पनि परिचालन गरिएको उनले बताए ।
हरिराम उप्रेती कान्तिपुरका गोरखा संवाददाता हुन् ।