कान्तिपुर मिडिया ग्रुपले शुक्रबार आयोजना गरेको ‘उज्यालो पूर्व: सम्भावनाबाट समृद्धितर्फ’ कार्यक्रमको समापन मन्तव्यका क्रममा गभर्नर पौडेलले मुलुकमा धेरैभन्दा धेरै उद्यमी आवश्यक रहेको भन्दै व्यवसायीलाई प्रोत्साहन गर्ने वातावरण बनाउनुपर्नेमा जोड दिए ।
काठमाडौँ — नेपाल राष्ट्र बैंकका गभर्नर विश्वनाथ पौडेलले राज्यले उद्यमीप्रति उदार दृष्टिकोण राख्नुपर्ने बताएका छन् ।कान्तिपुर मिडिया ग्रुपले शुक्रबार आयोजना गरेको ‘उज्यालो पूर्व: सम्भावनाबाट समृद्धितर्फ’ कार्यक्रमको समापन मन्तव्यका क्रममा उनले मुलुकमा धेरैभन्दा धेरै उद्यमी आवश्यक रहेको भन्दै उनले व्यवसायीलाई प्रोत्साहन गर्ने वातावरण बनाउनुपर्नेमा जोड दिएका हुन् ।
उनका अनुसार व्यवसायको आफ्नै संयन्त्र हुन्छ र राज्यको चाहना धेरैभन्दा धेरै व्यक्ति उद्यमी बनून्, अरूलाई रोजगारी दिऊन् र आफ्नो परिवारको जीवनस्तर सुधारून् भन्ने हुनुपर्छ ।
'राज्यले बिजनेस गर्ने मान्छे धेरै होऊन् भन्ने चाहन्छ । उनीहरूले अरूलाई जागिर दिऊन्, घरपरिवार राम्रोसँग चलाऊन् र उनीहरूका छोराछोरी सडकमा आउनुपर्ने अवस्था नहोस् भन्ने राज्यको चाहना हुनुपर्छ,' उनले भने ।
पौडेलले राज्यलाई अझ धेरै उद्यमी आवश्यक भए पनि उनीहरू कसरी उत्पादन गर्ने भन्ने स्पष्ट नीति र योजना नरहेको बताए । उद्यमशीलता विकासका लागि व्यवसायीप्रति राज्यको दृष्टिकोण उदार हुनुपर्ने उनको भनाइ छ ।
'राज्यलाई झन् धेरै उद्यमी चाहिएको छ । तर कसरी बनाउने भन्नेचाहिँ काम गर्न बाँकी छ,' उनले भने ।