सडक सहज बनेपछि तीव्र गतिका कारण दुर्घटनाको जोखिम बढेकाले प्रहरीले टाइम कार्ड लागू गरेको हो।
गुल्मी — गुल्मीको रिडी-तम्घास सडकखण्डमा टाइम कार्ड लागु भएको छ । मदनभण्डारी राजमार्ग अन्तर्गत यस खण्डमा सडक सहज बनेपछि सवारीसाधनकाे गति तीव्र बनेको थियो ।
तीव्र गतिका कारण सवारीसाधन दुर्घटना हुने डरले टाइम कार्ड लागु गरिएको जिल्ला प्रहरी कार्यालय गुल्मीका प्रमुख प्रहरी उपरीक्षक भीमकिरण बाेगटीले बताए । उनले अब सवारीसाधन दुर्घटनामा कमी आउने बिश्वास व्यक्त गरे ।
जिल्ला प्रहरीका सूचना अधिकारी प्रहरी नायब उपरीक्षक वीरेन्द्रवीर विश्वकर्माका अनुसार ४५ किलोमिटर रहेको यस खण्डमा प्रतिघण्टा ४० किलोमिटरको गति तोकिएको छ।
रिडीदेखि रुन्खादहसम्म फराकिलो सहज पक्की सडक बनेको छ । जसका कारण सवारीसाधनकाे गति तीव्र हुने गरेकाे छ । हाल उक्त तीव्र गति अब कमी आउने प्रहरीको विश्वास छ । टाइम कार्ड श्रृङ्गा र रिडीमा जाँच हुनेछ । जसका लागि ट्राफिक प्रहरी परिचालित गरिएको उनले बताए ।