काठमाण्डौ । नेपालबाट भारततर्फ हुने विद्युत् निर्यातको सीमा बढाउने तथा अन्तरदेशीय प्रसारणलाइन विस्तार गर्ने विषयमा नेपाल र भारतबीच छलफल भएको छ।
मंगलबार ऊर्जा, जलस्रोत तथा सिँचाइमन्त्री विराजभक्त श्रेष्ठ र नेपालका लागि भारतीय राजदूत सुधाकर दलेलाबीच भएको शिष्टाचार भेटवार्तामा ऊर्जा व्यापार तथा पूर्वाधार विकासका विभिन्न विषयमा छलफल भएको हो।
भेटमा निर्माणाधीन ऊर्जा परियोजनाहरू निर्धारित समयमै सम्पन्न गर्ने, अन्तरदेशीय विद्युत् प्रसारण पूर्वाधार विस्तारको सम्भावना खोज्ने र विद्युत् निर्यातको सीमा बढाउन आवश्यक सहजीकरण गर्ने विषयमा विचारविमर्श भएको छ।
त्यसैगरी, नेपालमा सौर्य ऊर्जाको विकास तथा विस्तारका लागि भारतीय पक्षसँग सहकार्य गर्ने सम्भावनाबारे समेत छलफल भएको छ।
भेटका क्रममा भूमिगत जलस्रोतको पुनर्भरणसम्बन्धी अध्ययन तथा अनुसन्धानमा दुई देशबीच सहकार्य गर्ने विषयले पनि प्राथमिकता पाएको थियो।
मन्त्री श्रेष्ठले राजदूत दलेलालाई सफल कार्यकालको शुभकामना दिँदै नेपाल–भारतबीच ऊर्जा तथा जलस्रोतका क्षेत्रमा सहकार्य थप विस्तार गर्नुपर्नेमा जोड दिए।
दुवै पक्षले द्विपक्षीय हितका ऊर्जा आयोजनालाई गति दिँदै ऊर्जा तथा जलस्रोत क्षेत्रमा आपसी सहकार्य थप प्रभावकारी बनाउने आवश्यकता औँल्याएका छन्।
अहिलेसम्म कुनै प्रतिक्रिया छैन। पहिलो प्रतिक्रिया तपाईंको हुन सक्छ।