काठमाण्डौ । चालु आर्थिक वर्ष २०८३/८४ को पहिलो त्रैमाससम्म जीवन बीमा कम्पनीहरूको कुल खुद नाफामा गिरावट आएको छ। सञ्चालनमा रहेका १४ जीवन बीमा कम्पनीहरूले समीक्षा अवधिमा कुल १ अर्ब ७४ करोड ३९ लाख रुपैयाँ खुद नाफा आर्जन गरेका छन्।
यो नाफा गत आर्थिक वर्ष २०८२/८३ को सोही अवधिको तुलनामा ११.३४ प्रतिशतले कम हो। गत वर्षको असोजसम्म जीवन बीमा कम्पनीहरूले कुल १ अर्ब ९६ करोड ६९ लाख रुपैयाँ खुद नाफा कमाएका थिए।
कम्पनीगत रूपमा हेर्दा सन नेपाल लाइफ इन्स्योरेन्स नाफाका आधारमा पहिलो स्थानमा रहेको छ। कम्पनीले समीक्षा अवधिमा २४ करोड ४९ लाख २३ हजार रुपैयाँ खुद नाफा आर्जन गरेको छ। गत वर्षको सोही अवधिमा कम्पनीको नाफा २३ करोड ९२ लाख ७७ हजार रुपैयाँ रहेको थियो। यससँगै कम्पनीको नाफा २.३६ प्रतिशतले बढेको छ।
त्यस्तै, रिलायबल नेपाल लाइफ इन्स्योरेन्स २२ करोड ९० लाख ६९ हजार रुपैयाँ खुद नाफासहित दोस्रो स्थानमा रहेको छ। तर, कम्पनीको नाफा गत वर्षको तुलनामा ११.३९ प्रतिशतले घटेको छ। गत वर्ष कम्पनीले २५ करोड ८५ लाख २ हजार रुपैयाँ नाफा कमाएको थियो।
समग्रमा जीवन बीमा कम्पनीहरूको कुल खुद नाफामा गिरावट देखिँदा अधिकांश कम्पनीको नाफा घटेको छ। यद्यपि, सन नेपाल लाइफले सबैभन्दा बढी नाफा कमाएको छ भने प्रभु महालक्ष्मी लाइफले नाफा वृद्धिमा अग्रता कायम गरेको छ।
जीवन बीमा कम्पनीहरुको खुद नाफामा संकुचन देखिएसँगै प्रतिसेयर आम्दानी (ईपीएस) पनि अधिकांशको घटेको छ ।
एशियन लाइफ इन्स्योरेन्स र सानिमा रिलायन्स लाइफ बाहेक सबैको ईपीएस गत आर्थिक वर्षको तुलनामा घटेको छ ।
सबैभन्दा धेरै सन नेपाल लाइफको १८.५५ रुपैयाँ छ, तर कम्पनीको यस्तो सूचक गत आवको तुलनामा भने ०.४० रुपैयाँ घटेको छ । गत वर्ष कम्पनीको ईपीएस १८.९५ रुपैयाँ थियो ।
त्यस्तै, एशियन लाइफको ०.६७ रुपैयाँ र सानिमा रिलायन्स लाइफको ०.०५ रुपैयाँ बढेको छ ।
अहिलेसम्म कुनै प्रतिक्रिया छैन। पहिलो प्रतिक्रिया तपाईंको हुन सक्छ।