तुलसीपुर उपमहानगरपालिका–५, मासु मार्केटस्थित तेजबहादुर डाँगीको घरमा जुवा खेलिरहेको भन्ने विशेष सूचनाका आधारमा पुगेको प्रहरी टोलीले ५ लाख ३० हजार २ सय ३५ रुपैयाँ नगद र १२ बुक तास बरामद गरेको थियो।
दाङ — तुलसीपुरमा जुवा खेलिरहेको अवस्थामा नगद र ताससहित प्रहरीले आइतबार राति १५ जनालाई पक्राउ गरेको छ। तुलसीपुर उपमहानगरपालिका–५, मासु मार्केटस्थित तेजबहादुर डाँगीको घरमा जुवा खेलिरहेको भन्ने विशेष सूचनाका आधारमा पुगेको प्रहरी टोलीले ५ लाख ३० हजार २ सय ३५ रुपैयाँ नगद र १२ बुक तास बरामद गरेको थियो।
घटनास्थलबाट पक्राउ पर्नेमा तुलसीपुर–५, बसपार्क निवासी ५५ वर्षीय मोहमद अनिस कुरेसी, वडा नं. ७, नयाँबस्ती निवासी ५२ वर्षीय भिमसेन विक, वडा नं. ८, दुधेना निवासी ३२ वर्षीय सिमोन सुनार र वडा नं. ९, बेलुवा निवासी ४५ वर्षीय मानबहादुर विक रहेका छन्।
यसैगरी, मासु मार्केट निवासी ५० वर्षीय रहिस कुरेसी, बेलुवा निवासी ४० वर्षीय कमल विक र ४९ वर्षीय केशव विक पनि पक्राउ परेका छन्। त्यसैगरी, तुलसीपुर–१५, हरिपौरा निवासी २६ वर्षीय बिशाल केसी, वडा नं. १२, जसपुर निवासी ३१ वर्षीय किशोर विक र वडा नं. ७, हात्तीखौवा निवासी ४५ वर्षीय धनेश्वर विक पक्राउ परेका छन्।
यस्तै, बेलुवा निवासी ६३ वर्षीय कुलबहादुर डाँगी र ३३ वर्षीय साहिद राईनी तथा घोराही उपमहानगरपालिका–८, ढिकपुर निवासी ४५ वर्षीय कान्तप्रसाद गिरी पक्राउ परेका छन्। यसैगरी, सल्यानको शारदा नगरपालिका–८, रानिकोट निवासी ३१ वर्षीय सुमन बुढाथोकी र कुपिण्डे नगरपालिका–९, जहितेपानी निवासी ४२ वर्षीय वीरबहादुर बिष्ट पनि पक्राउ परेका छन्।
पक्राउ परेका सबैलाई थुनामा राखी थप अनुसन्धान गरिरहेको जिल्ला प्रहरी कार्यालय दाङका प्रहरी निरीक्षक एक्कबहादुर नेपालीले जानकारी दिए।
दुर्गालाल केसी कान्तिपुरका दाङ संवाददाता हुन् ।