१६ कात्तिक, काठमाडौं । अन्तर्राष्ट्रिय जलवायु वित्तमा नेपालको पहुँच विस्तार गर्ने र आगामी कोप–३१ सम्मेलनको तयारीलाई तीव्रता दिने विषयमा कृषि, वन तथा पर्यावरणमन्त्री गिता चौधरी र अर्थमन्त्री स्वर्णिम वाग्लेबीच छलफल भएको छ ।
मुख्यगरी जलवायु वित्त परिचालन, हरित जलवायु कोष, अनुकूलन कोष र कार्बन वित्तका विषयमा गहिरो विमर्श भएको थियो ।
साथै, आगामी संयुक्त राष्ट्रसंघीय जलवायु परिवर्तनसम्बन्धी सम्मेलन (कोप–३१) को पूर्वतयारी र त्यसमा नेपालको उपस्थितिलाई कसरी प्रभावकारी बनाउने भन्ने विषयमा दुई मन्त्रीबीच छलफल भएको छ ।
भेटमा जलवायु अनुकूलन तथा हानि र नोक्सानी सम्बन्धी कार्यक्रमलाई थप प्रभावकारी रूपमा अघि बढाउने सहमति भएको छ ।
अन्तर्राष्ट्रिय मञ्चहरूमा जलवायु परिवर्तनका कारण नेपालले भोगिरहेको जोखिम र हाम्रा प्राथमिकताहरूलाई सशक्त रूपमा प्रस्तुत गर्दै थप सहायता भित्र्याउन दुवै मन्त्रालयले साझा रणनीति तय गर्ने विषयमा जोड दिइएको छ ।
