‘म मर्छु, अब मेरो यति नै हो भन्ने अवस्थामा पुगिसकेको थिएँ । उद्धार टोली मेरा लागि भगवानका रूपमा आए । बाहिर निस्किने बित्तिकै मैले सबैभन्दा पहिले जमिनमा ढोगेर सबैलाई नमस्कार गरें ।’
काठमाडौँ — रसुवास्थित त्रिशूली ३ ‘ए’ जलविद्युत् आयोजनाको सुरुङभित्र बाढीमा परी लगातार १० दिनसम्म अड्किएर जीवितै उद्धार गरिएका कर्मचारी कबिर महर्जनले आफूलाई नयाँ जीवन दिएकोमा उद्धारकर्मी, चिकित्सक र सम्पूर्ण शुभचिन्तकप्रति आभार व्यक्त गरेका छन् ।
सुरुङभित्र पानीको तीव्र बहाव र अन्धकारका बीच १० दिनसम्म भोकभोकै जीवन र मृत्युको दोसाँधमा संघर्ष गरेका महर्जनले आफ्नो भोगाइ र उद्धारपछिको अनुभूति साट्दै कान्तिपुर टेलिभिजनसँगको कुराकानीका क्रममा भने, ‘म मर्छु, अब मेरो यति नै हो भन्ने अवस्थामा पुगिसकेको थिएँ । उद्धार टोली मेरा लागि भगवानका रूपमा आए । बाहिर निस्किने बित्तिकै मैले सबैभन्दा पहिले जमिनमा ढोगेर सबैलाई नमस्कार गरें ।’
सुरुङभित्र अन्धकारमा पानी चुहिएको आवाज पछ्याउँदै त्यसैको भरमा १० दिन बिताएका महर्जनले साथीहरू र उद्धार टोलीप्रति ठूलो विश्वास रहेको बताए । छाउनीस्थित सैनिक अस्पतालमा २२ दिनको उपचारपछि घर फर्किएका उनले आफ्नो स्वास्थ्यमा द्रुत सुधार भइरहेको र अहिले आफैं हिंडडुल गर्न सक्ने भएको जानकारी दिए ।
जलवायु परिवर्तन र प्राकृतिक प्रकोपका विषयमा बोल्दै महर्जनले विश्व समुदायलाई प्रकृति संरक्षणमा जुट्न अपिलसमेत गरेका छन् । ‘अहिले आएको अप्रत्याशित बाढी हिमताल फुटेर र ‘ग्लोबल वार्मिङ’का कारण हो । हामी प्रकृतिबिना रहन सक्दैनौं । पानीबिना जीवन छैन, त्यसैले ठूला राष्ट्रहरूले पनि प्रकृतिको दोहन रोक्न र यसलाई माया गर्नुपर्छ,’ उनले भने ।
(66).jpg)
.jpeg)
