फ्रेममा सुरक्षित राखिएको ऐतिहासिक कपालका खरिदकर्ताको नाम सार्वजनिक गरिएको छैन, जबकि अन्य नमुना यसअघि अझ महँगोमा बिक्री भएका थिए।
काठमाडौँ — अमेरिकाका पहिलो राष्ट्रपति जर्ज वासिङ्टनको कपालको एक झुप्पा लिलामीमा ४ हजार अमेरिकी डलरमा बिक्री भएको छ ।
फ्रेममा राखिएको उक्त कपाल सन् १७९९ मा वासिङ्टनलाई रात्रिभोजमा आमन्त्रण गर्ने जोन ग्याड्स्बीको भएको लिलामीकर्ता संस्था रिचमन्ड अक्सन्सले जनाएको छ । वासिङ्टनको सोही वर्ष निधन भएको थियो ।
संस्थाका अनुसार ग्याड्स्बीका एक वंशजबाट संकलक जोन के. ल्याटिमरले उक्त कपाल प्राप्त गरेका थिए । लिलामीमा कपाल खरिद गर्ने व्यक्तिको नाम भने सार्वजनिक गरिएको छैन ।
शनिबार भएको लिलामीमा बिक्री भएको यो कपालको मूल्य वासिङ्टनका अन्य कपालको तुलनामा कम हो । सन् २०२१ मा उनको मृत्युअघि वा मृत्युपछि काटिएको मानिएका तीनवटा कपालका रेसा लकेटमा राखिएको अवस्थामा करिब ४० हजार डलरमा बिक्री भएका थिए ।
रिचमन्ड अक्सन्सको वेबसाइटमा प्रकाशित सन् १९२८ को एक बयानअनुसार ग्याड्स्बीले वासिङ्टनको निधन हुनुभन्दा केही समयअघि उनलाई रात्रिभोज दिएका थिए । ग्याड्स्बीकी नातिनी जुलिया टेन आइक म्याकब्लेयरले उक्त बयानमा हजुरबुबाले वासिङ्टनसँगको मित्रता र उनको जीवनको अन्तिम समयसँगको सम्बन्धका कारण कपाल प्राप्त गरेको उल्लेख गरेकी छन् ।
म्याकब्लेयरका अनुसार ग्याड्स्बीले उक्त कपाल फ्रेममा राखेर वासिङ्टन सिटीस्थित आफ्नो घरमा जनरल वासिङ्टनको तस्बिरमुनि झुन्ड्याएका थिए । उनले आफूले बाल्यकालदेखि नै उक्त कपाल देख्दै आएको बताएकी छन् । ग्याड्स्बीले सन् १७९८ र १७९९ मा वासिङ्टनको जन्मदिनका समारोहसमेत आयोजना गरेका थिए ।
वासिङ्टनले अमेरिकी स्वतन्त्रता संग्राममा बेलायती सेनाविरुद्ध अमेरिकी फौजको नेतृत्व गरेका थिए । त्यसमा विजय हासिल गरेपछि उनले अमेरिकी संविधानको मस्यौदा तयार पार्न योगदान दिएका थिए । सन् १७८८ मा अमेरिकाको पहिलो राष्ट्रपति बनेका उनले दुई कार्यकाल पूरा गरी सन् १७९७ मा पद छाडेका थिए ।
वासिङ्टनको कपालका अन्य नमुनासमेत सुरक्षित राखिएका छन् । तीमध्ये कम्तीमा ५० वटा नमुना उनको पूर्वनिवास माउन्ट भेर्ननमा संग्रहित छन् । उक्त स्थान अहिले संग्रहालयका रूपमा सञ्चालनमा छ ।
माउन्ट भेर्ननको वेबसाइटमा प्रकाशित एक ब्लगअनुसार १९औँ शताब्दीमा मित्र वा प्रियजनको कपाल सार्वजनिक रूपमा प्रदर्शन गर्ने चलन लोकप्रिय थियो । वासिङ्टनजस्ता सम्पन्न परिवारमा भने यो परम्परा त्यसअघि नै प्रचलनमा थियो ।
वासिङ्टनसँग सम्बन्धित अन्य सामग्री पनि लिलामीमा बिक्री हुँदै आएका छन् । गत जुलाईमा सन् १७७६ मा उनले लेखेको र हस्ताक्षर गरेको एउटा पत्र १ लाख ९ हजार ८ सय डलरमा बिक्री भएको थियो । उक्त पत्रमा बेलायती सेनाविरुद्ध लड्न कन्टिनेन्टल आर्मीका लागि सैनिक उपलब्ध गराउन आग्रह गरिएको थियो ।