शनिबार हुने नेपाल प्रिमियर लिग (एनपीएल) को फाइनल खेलको टिकट बिक्रीलाई लिएर इसेवा विवादमा परेको छ। सुदूरपश्चिम रोयल्स र लुम्बिनी लायन्सबीच हुने फाइनल खेलको टिकट बिक्री खुला भएलगत्तै सबै टिकट ‘सोल्ड आउट’ देखिएपछि क्रिकेट समर्थकले इसेवामाथि प्रश्न उठाएका हुन्।
इसेवाले शुक्रबार दिउँसो १ बजेबाट फाइनल खेलको टिकट बिक्री खुला गरेको थियो। तर, बिक्री सुरु भएको केही समयमै टिकट सकिएको देखिएपछि धेरै समर्थकले टिकट बुक गर्न नपाएको गुनासो गरेका छन्। कतिपयले टिकट बिक्री सुरु हुनुअघि नै ‘सोल्ड आउट’ देखिएको भन्दै सामाजिक सञ्जालमा असन्तुष्टि व्यक्त गरेका छन्।
सामाजिक सञ्जालमा समर्थकहरूले टिकट बिक्री प्रक्रियाको पारदर्शिता र निष्पक्षतामाथि प्रश्न उठाएका छन्। एक समर्थकले इसेवासँग अनलाइन बिक्रीका लागि छुट्याइएको टिकटको वास्तविक संख्या र बिक्री भएको टिकटको संख्या सार्वजनिक गर्न माग गरेका छन्।
त्यस्तै, अर्का समर्थक अश्बिन शर्माले टिकटको माग अत्यधिक हुनु र बिक्री प्रक्रिया पारदर्शी हुनु फरक विषय भएको उल्लेख गर्दै इसेवासँग चारवटा प्रश्नको जवाफ मागेका छन्। उनले अनलाइनमा कति टिकट उपलब्ध गराइएको थियो, टिकट कुन समयमा पूर्ण रूपमा बिक्री भयो, सबै प्रयोगकर्तालाई समान अवसर दिने गरी प्रतीक्षा प्रणाली (क्यु सिस्टम) लागू गरिएको थियो कि थिएन र आधिकारिक प्लेटफर्मबाटै सबै टिकट बिक्री भएको सुनिश्चित गर्न सकिन्छ कि सकिँदैन भन्ने विषय स्पष्ट पार्न आग्रह गरेका छन्।
समर्थकहरूले टिकटको माग धेरै भएको सामान्य जवाफभन्दा पनि बिक्री प्रक्रियाबारे तथ्यसहितको स्पष्टीकरण खोजिरहेका छन्। विशेषगरी अनलाइनमा उपलब्ध गराइएको टिकट संख्या, बिक्री सुरु भएको वास्तविक समय, टिकट सकिएको समय र प्रणालीले निष्पक्ष रूपमा काम गरेको विवरण सार्वजनिक गर्नुपर्ने उनीहरूको माग छ।