कप्तान रवि बोपाराले टस जितेर ब्याटिङ रोजेपछि फाइनल प्रवेशका लागि त्रिवि मैदानमा दुवै टोलीबीच निर्णायक प्रतिस्पर्धा हुँदैछ।
काठमाडौँ — चितवन राइनोजले नेपाल प्रिमियर लिग (एनपीएल) क्रिकेटको क्वालिफायर २ मा सुदूरपश्चिम रोयल्सविरुद्ध पहिला ब्याटिङ गर्ने भएको छ । चितवनका कप्तान रवि बोपाराले बिहीबार त्रिवि अन्तर्राष्ट्रिय क्रिकेट रंगशाला, कीर्तिपुरमा टस जितेर ब्याटिङ गर्ने निर्णय गरेका हुन् ।
यस खेल जित्ने टोली फाइनलमा पुग्नेछ । राउन्ड रोबिन लिगमा सुदूरपश्चिम दोस्रो र चितवन चौथो भएको थियो । सुदूरपश्चिम क्वालिफायर १ मा लुम्बिनी लायन्ससँग ६ विकेटले पराजित भएको थियो । चितवनले इलिमिनेटरमा बुधबार काठमान्डु गोर्खाजलाई ६१ रनले पराजित गरेको थियो ।
चितवन पहिलो पटक क्वालिफायर २ मा खेलिरहेको छ । सुदूरपश्चिमले पहिलो दुई सिजन नै फाइनल खेलेको थियो र दुवै पटक उपविजेतामै सीमित भएको थियो ।
चितवनले अघिल्लो दिन खेलेको टोलीबाट क्वालिफायर २ का लागि कुनै खेलाडी परिवर्तन गरेको छैन । सुदूरपश्चिमको टोलीमा दुई खेलाडी परिवर्तन गरिएको छ । अविनाश बोहराको स्थानमा दीपक बोहरा र थानुका दवारेको स्थानमा फाबियन एलेनलाई खेलाएको छ ।