सीमा स्तम्भको निगरानीदेखि अवैध चोरी पैठारी र आपराधिक गतिविधि नियन्त्रणसम्म स्थानीय बासिन्दाको सहयोग आवश्यक रहेको बाहिनीपति दीपक अधिकारीको भनाइ छ ।
बर्दिया — सशस्त्र प्रहरी बल नेपाल, ५ नम्बर विन्ध्यवासिनी बाहिनी मुख्यालय, रुपन्देहीका बाहिनीपति दीपक अधिकारीले सीमाक्षेत्रका बासिन्दाबाट सीमा स्तम्भको निगरानी, सीमामा हुने आपराधिक गतिविधि र अवैध चोरी पैठारी नियन्त्रणमा महत्त्वपूर्ण योगदान रहेको बताएका छन् ।
बुधबार गुलरिया स्थित सशस्त्र प्रहरी बल ३१ नम्बर गणको आयोजनामा भएको अन्तरक्रिया कार्यक्रममा उनले यस्तो बताएका हुन् ।
सीमा क्षेत्रका १८ वटामध्ये १७ वडाका वडाध्यक्षसहित ३५ जनाको उपस्थितिमा भएको अन्तरक्रिया कार्यक्रममा बाहिनीपतिले सीमामा हुने आपराधिक गतिविधिमा निगरानी र सहजीकरण हुने बताएका हुन् ।
आपराधिक गतिविधि, अवैध चोरी पैठारी, लागुऔषध ओसारपसार नियन्त्रण, मानव बेचबिखन, वन पैदावार तथा वन्यजन्तु ओसारपसार, अवैध हतियार तथा विस्फोटक पदार्थ ओसारपसार, तेस्रो मुलुकको अवैध घुसपैठ नियन्त्रण र सीमा निगरानीमा सहजीकरणका विषयमा छलफल भएको थियो ।
कार्यक्रममा ३१ नम्बर गणका गणपति दिनेश कुमार महत, जिल्लाका सीमावर्ती गुल्मपति, बीओपीपतिलगायतको उपस्थिति थियो ।
कमल पन्थी कान्तिपुरका बर्दिया संवाददाता हुन् ।