लोकसेवा आयोगले सार्वजनिक गरेको १८९ जना शाखा अधिकृतको अन्तिम सूचीमा गुल्मीका १० जना प्रशासन, लेखा र राजस्व समूहमा सिफारिस भएका छन् ।
बुटवल — निजामती सेवामा माथिल्लो तहसम्मै वर्चस्व राख्दै आएको गुल्मीले यसपटक पनि चर्चा पाएको छ । कात्तिक तेस्रो साता प्रकाशित लोकसेवा आयोगको राजपत्रांकित तृतीय श्रेणी (शाखा अधिकृत) पदको नतिजामा गुल्मीका १० जना उम्मेदवार सफल भएका हुन् ।
लोकसेवाले १ सय ८९ जनाको सूची सार्वजनिक गरेकोमा गुल्मीका विभिन्न स्थानीय तहमा स्थायी ठेगाना भएका १० जना निजामती सेवाका लागि सिफारिस भएका हुन् ।
लोकसेवा आयोगले राजपत्रांकित तृतीय श्रेणीका लागि अन्तिम नतिजामा १ सय ८९ जना उम्मेदवारलाई स्थायी नियुक्तिका लागि सिफारिस गरेको थियो । त्यसमा खुलातर्फ ९३ जना र बाँकी अन्य तथा समावेशी समूहबाट सिफारिस भएका हुन् । यसअघि पनि २०८० सालमा ११८ जना शाखा अधिकृत सिफारिस हुँदा गुल्मीबाट १६ जना परेका थिए । यसपटक पनि १० जनाले नाम निकालेपछि जिल्लाको चर्चा बढेको हो ।
गुल्मीपछि यस क्षेत्रका स्याङ्जा, पाल्पा र अर्घाखाँचीका युवामा पनि लोकसेवाप्रतिको चासो बढ्दो छ । त्यसैले निजामती सेवामा पनि त्यहीअनुसारका कर्मचारीको वर्चस्व रहेको देखिन्छ ।
यसपटकको नतिजामा गुल्मीको धुर्कोट गाउँपालिकाबाट तीन जना छन् । धुर्कोट–४ का विनोदप्रसाद पोखरेल र निर्मला पोखरेल तथा धुर्कोट–६ का सुशील खत्री अधिकृत बनेका छन् ।
त्यस्तै, इस्मा गाउँपालिका–५ का विपिन घिमिरे र इस्मा–४ की गोमा बस्नेत, रुरुक्षेत्र गाउँपालिका–४ की प्रतिमा ज्ञवाली, मुसिकोट नगरपालिका–३ का रणबहादुर थापा, मालिका गाउँपालिका–४ की लक्ष्मी अर्याल, रेसुंगा नगरपालिका–२ का प्रकाश पन्थी र मदाने गाउँपालिका–२ का प्रकाश भुसाल सिफारिस भएका छन् । सिफारिस हुनेहरू प्रशासन, लेखा र राजस्व समूहका छन् ।
सिफारिस भएका उम्मेदवारहरूको पृष्ठभूमि भने फरक–फरक छ । सिफारिस भएकामध्ये कोही पहिलोपटकमै अधिकृत बनेका हुन् भने कोही तल्लो तहबाट प्रतिस्पर्धा र संघर्ष गर्दै अधिकृत तहमा पुगेका छन् । केही पदोन्नतिबाट आएका छन् ।
इस्मा–५ का विपिन घिमिरेले तल्लो तहबाट सुरु गरेर अधिकृतसम्मको यात्रा पूरा गरेका छन् । उनी सुरुमा खरिदारबाट निजामती सेवामा प्रवेश गरेका थिए । पछि नायब सुब्बा हुँदै महान्यायाधिवक्ताको कार्यालयमा कार्यरत रहेकै बेला उनी शाखा अधिकृत बन्न सफल भएका हुन् । छोराको निरन्तरको साधना र सफलताले परिवारको सपना पूरा भएको उनका बुवा ईश्वरीप्रसाद घिमिरेले बताए ।
त्यस्तै, मालिका–४ की २७ वर्षीया लक्ष्मी अर्याल पूर्वसञ्चारकर्मी हुन् । झन्डै तीन वर्ष सञ्चार क्षेत्रमा काम गरेकी उनी सामाजिक र राजनीतिक काममा पनि सक्रिय थिइन् । तर, सञ्चारकर्मीको जिम्मेवारी छोडेपछि उनले अध्ययन सकेर सरकारी कर्मचारी बन्ने प्रयासमा लागिन् । त्यहीअनुसारको संघर्षले पहिलो प्रयासमै अधिकृत बन्ने सफलता पाएको उनले बताइन् । ‘गुल्मीमा लोकसेवा तयारीका लागि अग्रजहरूको राम्रो माहोल र प्रेरणा पाइन्छ,’ उनले भनिन्, ‘त्यही वातावरणले गर्दा पहिलो प्रयासमै नाम निकाल्न सफल भएँ ।’ लोकसेवाका लागि कठिन मेहनतभन्दा पनि सेड्युलबेसको अध्ययन महत्त्वपूर्ण हुने उनको सुझाव छ ।
रुपन्देहीको मर्चवारी गाउँपालिकामा कार्यरत रहँदै अधिकृतमा नाम निकालेका धुर्कोटका सुशील खत्रीले निरन्तरको अध्ययन, आत्मविश्वास र धैर्य नै लोकसेवाको मूलमन्त्र भएको अनुभव सुनाए । ‘नियमित र योजनाबद्ध मेहनत गर्न सके नतिजा आफ्नै पक्षमा आउँछ,’ उनले भने, ‘मुख्यतः निरन्तरको प्रयास नै हो ।’ मुसिकोट नगरपालिका–३ का थापा पनि स्थानीय तह र जिल्ला प्रशासन कार्यालयमा नायब सुब्बाका रूपमा काम गर्दै अहिले अधिकृतमा पुगेका हुन् ।
घनश्याम गौतम कान्तिपुरका बुटवल संवाददाता हुन् ।