१ मंसिर, काठमाडौं । राष्ट्रिय स्वतन्त्र पार्टी (रास्वपा) का सहप्रवक्ता सुरेन्द्र चौधरीले नेपाल प्रहरीका निवर्तमान आईजीपी दानबहादुर कार्कीलाई अदालतले पुनर्बहाली गरेपनि काम गर्न नदिने चेतावनी दिएका छन् ।
रास्वपा सहप्रवक्ता चौधरीले हिमालय टीभीसँगको कुराकानीमा उक्त चेतावनी दिएका हुन् ।
‘म तपाईँलाई यत्ति भन्छु– जस्ट इनकेस, अदालतले दानबहादुर कार्कीलाई पुनर्बहाली गर्यो भनेपनि आईजीपी बन्नुहुन्न् । त्यस्तो मान्छेलाई राख्नै हुन्न नि अब’, उनले भने । दानबहादुर कार्कीबाट प्रहरी संगठन चल्नै नसक्ने चौधरीले दाबी गरे ।
पूर्ववत् रूपमा कार्य गर्न नदिन सरकारले अरु वैधानिक बाटोहरू खोज्नसक्ने चौधरीले संकेत गरे ।
सरकारले नयाँ पद सिर्जना गरेर आईजीपीबाट हटाएपछि पुनर्बहालीको माग लिएर पूर्व आइजीपी कार्कीले सर्वोच्च अदालतमा रिट दायर गरेका छन् । सर्वोच्च अदालतले उक्त रिट निवेदनमाथि बुधबार (भोलि) प्रारम्भिक सुनुवाइ गर्ने भएको छ ।
२० कात्तिकमा रिट निवेदन दर्ता भएकोमा सर्वोच्च अदालतले तिहार बिदापछि ३० कात्तिकमा मिति तोकेको थियो । तर सरकारले त्यो दिन छठको बिदा दिएकाले मुद्दाको सुनुवाइ स्वतः सरेको थियो ।