विवाह दुई व्यक्तिबिच सम्बन्ध गाँसिने औपचारिक प्रक्रिया मात्र होइन, सुखदुःखमा एकअर्काको सहारा बन्ने र साझा भविष्य निर्माण गर्ने जीवनभरको प्रतिबद्धता हो । यसका लागि विश्वास, इमानदार, समझदारी र जिम्मेवारी सबैभन्दा महत्वपूर्ण आधार हुन् तर पछिल्लो समय जीवनसाथी छनोट गर्दा यस्ता मानवीय गुणभन्दा विदेशको बसोबास अनुमति, आर्थिक हैसियत र सामाजिक प्रतिष्ठालाई प्राथमिकता दिन थालिएको देखिन्छ । सम्बन्धको आत्मीयताभन्दा अवसरको आकर्षण बलियो हुँदै गएको यो प्रवृत्तिले विवाहको वास्तविक उद्देश्यलाई नै पुनर्विचार गर्नुपर्ने अवस्था सिर्जना गरेको छ ।
अमेरिकामा बसोबास गर्दै आएकी नेपालीमूलकी ममता काफ्ले भट्टको हत्या प्रकरणले वैवाहिक सम्बन्धभित्रको विश्वास, सुरक्षा र मानवीय संवेदनामाथि गम्भीर प्रश्न उठाएको छ । आफ्नै श्रीमान्बाट भएको अमानवीय र निर्मम हत्याले दुई परिवारको जीवन उजाडेको छ । सन् २०२६ नोभेम्बर १० मा अमेरिकाको भर्जिनिया राज्यस्थित अदालतमा बसेको जुरीले उनका श्रीमान् नरेश भट्टलाई प्रथम श्रेणीको हत्या, शव लुकाउने र शव विकृत पार्ने तीन वटै अभियोगमा दोषी ठहर गरेको छ । ममताको शव अझै फेला परेको छैन र सजाय निर्धारणका लागि सन् २०२७ मार्च १२ को मिति तोकिएको छ । यस घटनालाई विदेशमा बस्ने व्यक्तिसँग विवाह गर्नुको परिणामका रूपमा बुझ्नु गलत हुन्छ । कुनै एक व्यक्तिको अपराधलाई विदेशमा बस्ने सम्पूर्ण नेपालीसँग जोडेर हेर्न पनि मिल्दैन । तथापि, यसले विवाहअघि जीवनसाथीको वास्तविक व्यक्तित्व बुझ्ने, सम्बन्धको आधार पहिचान गर्ने र वैवाहिक जीवनप्रतिको हाम्रो दृष्टिकोणमाथि पुनर्विचार गर्नै पर्छ भन्नेतर्फ सचेत गराएको छ ।
स्रोतमा पूरा पढ्नुहोस् ( gorkhapatraonline.com )