साउदी गृह मन्त्रालयका अनुसार दोषी रोजगारदातालाई ६ महिनासम्म कैद र ५ वर्षसम्म नयाँ श्रमिक भर्नामा प्रतिबन्धसमेत हुनेछ ।
काठमाडौं — साउदी अरबमा आफ्ना घरेलु श्रमिकलाई अर्को रोजगारदाताकहाँ वा आफ्नै हिसाबले काम गर्न अनुमति दिने व्यक्तिगत रोजगारदातालाई एक लाख साउदी रियाल (करिब ३६ लाख रुपैयाँ)सम्म जरिवाना हुने भएको छ ।
साउदी अरबको गृह मन्त्रालयले आइतबार सार्वजनिक गरेको सूचनाअनुसार यस्तो कसुरमा संलग्न रोजगारदातालाई ६ महिनासम्म कैद र ५ वर्षसम्म नयाँ श्रमिक भर्ना गर्न प्रतिबन्धसमेत लगाइनेछ ।
मन्त्रालयले आवासीय अनुमति (इकामा) श्रम तथा सीमा सुरक्षासम्बन्धी नियम उल्लंघन नगर्न रोजगारदातालाई सचेत गराएको छ । आफ्ना श्रमिकलाई अर्को रोजगारदाताका लागि काम गर्न दिने वा व्यक्तिगत रूपमा अन्यत्र काम गर्न अनुमति दिने कार्यलाई नियमविपरीत मानिने मन्त्रालयले जनाएको छ ।
मन्त्रालयले यस्ता गतिविधि भएको थाहा पाएमा जानकारी गराउन सर्वसाधारणलाई आग्रह समेत गरेको छ । मक्का, मदिना, रियाद र पूर्वी प्रान्तमा ९११ तथा साउदी अरबका अन्य क्षेत्रमा ९९९ नम्बरमा फोन गरेर उजुरी गर्न सकिने जनाएको छ ।
साउदी अरबमा घरेलु श्रमिकसहित व्यक्तिगत रोजगारदातामार्फत काम गर्ने विदेशी श्रमिकका हकमा यो व्यवस्था महत्त्वपूर्ण छ । आफ्ना रोजगारदाताबाहेक अन्यत्र काम गर्दा श्रमिक र रोजगारदाता दुवै कानुनी कारबाहीमा पर्न सक्ने भएकाले मन्त्रालयले नियम पालना गर्न आग्रह गरेको हो ।
होम दुई दशकदेखि पत्रकारिता गरिरहेका कार्कीले श्रम तथा आप्रवासन मामिलामा दख्खल राख्छन् । उनले खाडी क्षेत्र तथा मलेसियामा कार्यरत आप्रवासी श्रमिकमाथि रिपोटिङ गर्दै आएका छन् । उनकाे श्रम र आप्रवासनमा केन्द्रीत गैरआख्यान पुस्तक 'सनैया' प्रकाशित छ ।