अमेजन एमजीएम स्टुडियोले सोमबार आधिकारिक घोषणा गर्दै ड्यानियल क्रेगपछि ००७ को भूमिकामा प्याटिन्सनलाई चयन गरेको जनाएको छ ।
काठमाडौँ — हलिउड अभिनेता रोबर्ट प्याटिन्सन नयाँ जेम्स बन्ड बन्ने भएका छन् । अमेजन एमजीएम स्टुडियोले सोमबार आधिकारिक घोषणा गर्दै ड्यानियल क्रेगपछि ००७ को भूमिकामा प्याटिन्सनलाई चयन गरेको जनाएको छ । उनी जेम्स बन्डको भूमिकामा देखिने सातौं अभिनेता हुनेछन् ।
प्याटिन्सनले यो भूमिका पाउनु आफ्नो जीवनकै ठूलो सम्मान भएको बताएका छन् । निर्देशक डेनिस भिलनुभले उनलाई ००७ को कालजयी चरित्रमा नयाँपन ल्याउन सक्ने अभिनेता भन्दै स्वागत गरेका छन् ।
२६ औं शृंखलाको नयाँ बन्ड फिल्मको निर्देशन भिलनुभले गर्नेछन् भने पटकथा ‘पिकी ब्लाइन्डर्स’का लेखक स्टिभन नाइटले लेख्नेछन् । एमी पास्कल र डेभिड हेमनले फिल्म निर्माण गर्नेछन् ।
यसअघि ड्यानियल क्रेगले सन् २००६ देखि २०२१ सम्म पाँचवटा फिल्ममा जेम्स बन्डको भूमिका निर्वाह गरेका थिए । उनको अन्तिम फिल्म ‘नो टाइम टु डाइ’ सन् २०२१ मा प्रदर्शन भएको थियो ।
‘ट्वाइलाइट’का भ्याम्पायरदेखि जेम्स बन्डसम्म
४० वर्षको उमेरमा जेम्स बन्डको भूमिकामा चयन भएका बेलायती अभिनेता रोबर्ट प्याटिन्सनले करिब दुई दशक लामो अभिनय यात्रामा फरक–फरक चरित्रमार्फत आफ्नो पहिचान बनाएका छन् । सन् २००५ मा प्रदर्शन भएको ‘ह्यारी पोटर एन्ड द गोब्लेट अफ फायर’बाट ठूलो पर्दामा चिनिएका उनी ‘ट्वाइलाइट’ फिल्म शृंखलाबाट विश्वव्यापी लोकप्रिय बनेका थिए । त्यसमा उनले भ्याम्पायर एडवर्ड कलनको भूमिका निर्वाह गरेका थिए ।
तर प्याटिन्सनले आफूलाई किशोर दर्शकमाझ लोकप्रिय रोमान्टिक पात्रमा मात्र सीमित राखेनन् । ‘गुड टाइम’ (२०१७), ‘द लाइटहाउस’ (२०१९) र ‘टेनेट’ (२०२०) जस्ता फिल्ममा अभिनय गर्दै उनले फरक शैलीका भूमिकामा आफ्नो क्षमता देखाए ।
सन् २०२२ मा प्रदर्शन भएको ‘द ब्याटम्यान’मा ब्रुस वेन अर्थात् ब्याटम्यानको भूमिका निर्वाह गरेपछि उनी सुपरहिरो फिल्मका प्रमुख अभिनेताका रूपमा स्थापित भए । सन् २०२५ को ‘मिक्की १७’मा उनले एउटै पात्रका फरक प्रतिरूपको भूमिका निर्वाह गरेका थिए ।
यही वर्ष उनी ‘द ड्रामा’, क्रिस्टोफर नोलनको ‘द ओडिसी’ र ‘प्राइमटाइम’मा देखिएका छन् । डेनिस भिलनुभको ‘ड्युन : पार्ट थ्री’मा पनि उनको अभिनय छ । यस फिल्ममा उनले स्काइटेलको भूमिका निर्वाह गरेका छन् ।
अन्तर्रााष्ट्रिय सञ्चारमाध्यमहरूका रिपोर्टअनुसार प्याटिन्सनले नयाँ जेम्स बन्ड फिल्म र ‘द ब्याटम्यान पार्ट २’को छायांकन लगालग गर्ने भएका छन् । ‘द ब्याटम्यान पार्ट २’को छायांकन सन् २०२७ सम्म जारी रहनेछ । त्यसपछि उनी जेम्स बन्ड फिल्मको छायांकनमा जुट्ने अपेक्षा गरिएको छ ।