२८ कात्तिक, महोत्तरी । महोत्तरीको गौशाला बजारस्थित अतिक्रमित सरकारी जग्गा खाली गराउन नगरपालिकाले आवश्यक सुरक्षा व्यवस्थाको माग गर्दै प्रधानमन्त्री बालेन शाहलाई पत्र लेखेको छ ।
गौशाला नगरपालिकाका प्रमुख डा. दिपेन्द्र महतोले शुक्रबार प्रधानमन्त्री शाहलाई पत्र लेख्दै गौशाला बजारस्थित सरकारी जग्गा खाली गराउने कार्यका लागि आवश्यक सुरक्षा प्रबन्ध मिलाइदिन आग्रह गरेका हुन् ।
सुरक्षा व्यवस्थाका लागि प्रहरी महानिरीक्षकदेखि गृहमन्त्रालय, प्रधानमन्त्री कार्यालयसम्म पुगेर आग्रह गर्दा पनि आवश्यक बन्दोबस्त नभएपछि बाध्य भएर प्रधानमन्त्रीलाई पत्र लेख्नुपरेको नगरप्रमुख डा. महतोले बताए ।
अतिक्रमण हटाउन पटक–पटक सूचना जारी गर्दा पनि जग्गा खाली नभएको र अदालतबाट समेत अतिक्रमणकारीको पक्षमा परेका रिट खारेज भइसकेको अवस्थामा सरकारी जग्गामा भएको अतिक्रमण हटाउन आवश्यक सुरक्षा प्रबन्ध मिलाइदिन आग्रह गर्दै आएको उनको भनाइ छ ।
नगर प्रमुख महतोका अनुसार कित्ता नम्बर ११५ मा ४२ वटा घर रहेका छन् । तीमध्ये दुई घर सुकुमवासी परिवारका हुन् । उनीहरूको अवस्था पनि राम्रो रहेको उल्लेख गर्दै उनले नगरपालिकाले अहिले बसोबास गरिरहेको अवस्थाभन्दा राम्रो आवासको व्यवस्था गरिदिने प्रस्तावसमेत गरेको बताए ।
‘४२ घरमध्येदुई घर सुकुमवासीका छन् । उहाँहरूको अवस्था पनि राम्रो छ । तैपनि हामीले नगरपालिकाबाट अहिलेको भन्दा राम्रो बासको व्यवस्था गरिदिन्छौँ भनेका छौं,’ नगरप्रमुख डा. महतोले भने ।
उनका अनुसार साविक शिवभक्तिखोर गाविस–१ स्थित कित्ता नम्बर ११५ को पाँच बिघा तीन कठ्ठा आठ धुर जग्गा नेपाल सरकारको नाममा दर्ता छ । उक्त जग्गामा लामो समयदेखि विभिन्न व्यक्तिले अतिक्रमण गरी घरटहरा निर्माण गरेर बसोबास गर्दै आएका छन् ।
नगरपालिकाले पटक–पटक सार्वजनिक सूचना जारी गरी अतिक्रमित जग्गा खाली गर्न आग्रह गरे पनि सम्बन्धित व्यक्तिहरूले अटेर गर्दै आएको जनाएको छ । नगरपालिकाले उक्त जग्गा खाली गराएर बाल उद्यान निर्माण तथा हाटबजार व्यवस्थापन गर्ने योजना अघि सारेको नगरप्रमुख डा. महतोले बताए ।
जग्गा आफ्नो नाममा कायम गराउन अतिक्रमण गरी बसेका व्यक्तिहरूले सर्वोच्च अदालत र उच्च अदालत जनकपुरधाममा मुद्दासमेत दायर गरेका थिए । सर्वोच्च अदालतमा दायर मुद्दामा यसअघि नै रिट खारेज भएको थियो भने उच्च अदालत जनकपुरधाममा दायर उत्प्रेषण मिश्रित प्रतिषेध रिट पनि खारेज भएको छ ।
यसअघि गत चैतमा पनि सोही कित्तामा सार्वजनिक जग्गा अतिक्रमण गरी पक्की घर निर्माण भइरहेको उजुरीपछि गौशाला नगरपालिकाले संरचना हटाउने प्रयास गरेको थियो । निर्माण सामग्री नहटाएपछि सुरक्षा निकायको सहयोगमा निर्माणाधीन संरचना भत्काइएको थियो । तर, जग्गा खाली गराउने विषय भने अझै टुंगिएको छैन ।
उक्त खाली गराउने नगरपालिकाको तयारीविरुद्ध गत जेठमा अतिक्रमण गरी बसेका स्थानीयले संघर्ष समितिसमेत गठन गरेका थिए । उनीहरुले आफूहरू लामो समयदेखि उक्त क्षेत्रमा बसोबास गर्दै आएको भन्दै वैकल्पिक व्यवस्था नगरी घरटहरा हटाउन नहुने माग राखेका थिए । त्यसक्रममा गौशाला बजार बन्द गरी विरोध प्रदर्शनसमेत गरिएको थियो ।
अदालतबाट रिट खारेज भइसकेपछि अतिक्रमण हटाएर जग्गा खाली गराउने प्रक्रिया अघि बढाउन नगरपालिकाले विभिन्न सरकारी निकायसँग सुरक्षा सहयोग माग्दै आएको छ ।
‘सरकारी जग्गा खाली गराउन समाननीय प्रधानमन्त्रीज्यू काठमाडौंको मेयर हुँदाकै अवस्थादेखि सक्रिय हुनुहुन्छ । उहाँले सुरक्षा व्यवस्थाका लागि आवश्यक निर्देशन गर्नुहुन्छ भन्ने हामीलाई पूर्ण विश्वास छ,’ नगरप्रमुख डा. महतोले भने ‘सुरक्षा व्यवस्था उपलब्ध भएको २४ घण्टाभित्र अतिक्रमित जग्गा खाली हुन्छ ।’
