२८ कात्तिक, विराटनगर । सम्पत्ति शुद्धीकरण कसुरको आरोपमा अनुसन्धानका लागि प्रहरीले बोलाउँदा नआएपछि प्रहरीले विवादास्पद छविका अभिषेक गिरीको घरमा सूचना टाँसेको छ ।
जिल्ला प्रहरी कार्यालय मोरङले बयानका लागि आउन भन्दै हुलाकमार्फत पठाएको पत्र बुझ्ने नभेटेपछि घरको भित्तामा सूचना टाँसिएको हो ।
जिल्ला प्रहरी कार्यालय मोरङका अनुसार शुक्रबार गिरीको घरमा सूचना टाँसिएको हो ।
सम्पत्ति शुद्धीकरणसम्बन्धी मुद्दामा बयानका लागि बोलाउँदा नआएपछि मोरङ प्रहरीले गत १९ कात्तिकमा गिरीलाई हुलाकमार्फत पत्र काटेको थियो । तर प्रहरीले पक्राउ गर्ने सूचना पाएपछि गिरी फरार छन् ।
प्रहरीले काटेको पत्रमा आफ्नो दसीप्रमाण तथा आवश्यक कागजातसहित सात दिनभित्र उपस्थित हुन अनुरोध भनिएको छ । पत्र काटेको सात दिन बित्दा पनि उनी सम्पर्कमा नआएपछि कानुनी प्रक्रियाको दोस्रो चरणअन्तर्गत घरमा सूचना टाँस गरेको हो ।
आपराधिक लाभ लिई संगठित अपराध गरेको आरोप लागेका गिरीविरुद्ध अहिले प्रहरीले सम्पत्ति शुद्धीकरणसम्बन्धी मुद्दाको अनुसन्धान गरिरहेको छ । तर, उनी गत असोजदेखि भारत गएर बसेकाे प्रहरी स्राेतकाे दाबी छ ।
मोरङ कारागारका कैदीबन्दीलाई बाडेकाे १३ लाख बढी भत्ता गायब भएपछि गत १३ असारमा गिरी पक्राउ परेका थिए ।
उच्च अदालत विराटनगरकाे आदेशपछि म्याद थप नभएपछि २३ असारमा छुटेका उनलाई साेही दिन प्रहरीको केन्द्रीय अनुसन्धान ब्यूरो (सीआईबी)ले पक्राउ गरेकाे थियो ।
२१ साउनमा छुटेका उनलाई पुनः मोरङ प्रहरीले नियन्त्रणमा लिएको थियो । उजुरीकर्तासँग मिलापत्रपछि उनी छुटेका थिए । त्यसपछि उनी सक्रिय भएनन् ।
नेपाली कांग्रेसको राजनीतिमा प्रवेश गरेका उनी पक्राउ पर्ने डरले कांग्रेसकाे १५औं महाधिवेशनमा पनि सार्वजनिक रूपमा देखिएनन् ।
अपहरण तथा शरीर बन्धक मुद्दामा कैद भुक्तान गरी छुटेका उनीमाथि माेरङ कारागारमा असुली धन्धा चलाएको, निर्माण व्यवसायीकाे सम्पत्ति हडपेकाे आराेप छ । तर, उनी आवरणमा भने सामाजिक गतिविधि गर्थे । आफ्नै नेतृत्वमा खाेलेकाे गिरी फाउन्डेसन मार्फत सामाजिक गतिविधि गरेका थिए ।
.jpg)
