पूर्वनगरप्रमुखको निधनमा कपिलवस्तुका दुई स्थानीय तहमा शुक्रबार बिदा

दीर्घरोगबाट पीडित ८२ वर्षीय गुप्ताको बिहीबार निधन भएको हो ।

कपिलवस्तु — कपिलवस्तु र महाराजगंज नगरपालिकाले शुक्रबार शोक बिदा दिएका छन् । तिहारपछि शुक्रबार कार्यालय खुल्ले भए पनि कपिलवस्तु नगरपालिकाका पूर्वनगरप्रमुख रामदास गुप्ताको निधनमा दुबै नगरपालिकाले शुक्रबार शोक बिदा गरेका हुन् ।

कपिलवस्तु नगरपालिकाका नगरप्रमुख सुदीप पौडेल र महाराजगंज नगरपालिकाका नगर प्रमुख अब्दल कलामले बिहीबार सूचना जारी गर्दै जिल्लाका विकासप्रेमी नेताका रुपमा स्थापित गुप्ताको निधनले अपूरणीय क्षति पुगेको उल्लेख गरेका छन् । दुवै नगरपालिकाले शुक्रबार पालिका तथा वडा कार्यालय, स्वास्थ्य संस्था (अत्यावश्यक सेवाबाहेक) तथा सामुदायिक, संस्थागत र धार्मिक शिक्षण संस्थामा शोक बिदा दिएको जनाएका छन् ।

२०२७ सालदेखि राजनीति गर्दै आएका गुप्ता २५ वर्षबढीदेखि कपिलवस्तु नगरपालिकाको नेतृत्वमा रहेका थिए। २०३९ सालमा तौलिहवा नगर पञ्चायत स्थापना भएपछि उनी नगर प्रमुख निर्वाचित भएका थिए ।

०४३ सालमा पनि उनी नगर पञ्चायतको प्रमुख निर्वाचित भएका थिए । त्यसैगरी, २०४८ र २०५४ सालमा कपिलवस्तु नगरपालिकाको नगरप्रमुखमा निर्वाचित भएका थिए । २०७४ सालको स्थानीय तह निर्वाचनमा समेत नगरप्रमुखका उम्मेदवार बनेका उनी पराजित भएका थिए ।

लामो समयदेखि मधुमेह, उच्च रक्तचापलगायतका रोगबाट पीडित ८२ वर्षे गुप्ताको कपिलवस्तु नगरपालिका–२ जमुहावारस्थित आफ्नै निवासमा बिहीबार बिहान ६ बजे निधन भएको हो ।

मनोज पौडेल लुम्बिनीस्थित कान्तिपुर संवाददाता हुन् ।