वीरगन्ज कारागारबाट फरार कैदी साह भारतको आदापुरबाट पक्राउ

१४ वर्षको कैद सजाय भोगिरहेका पोखरिया नगरपालिका सतवरियाका ३० वर्षीय सुनिल साह कारागारको पर्खाल नाघेर बिहीबार बिहान भागेका थिए । उनको कैद भुक्तान हुन २ वर्ष मात्रै बाँकी थियो ।

वीरगन्ज — पर्साको वीरगन्ज कारागारबाट बिहीबार बिहान फरार भएका कैदी सुनिल साह केही घण्टाभित्रै पक्राउ परेका छन् । जबरजस्ती करणी मुद्दामा १४ वर्षको कैद सजाय भोगिरहेका पोखरिया नगरपालिका–सतवरियाका ३० वर्षीय साह कारागारको पर्खाल नाघेर भागेका थिए ।

जिल्ला प्रहरी कार्यालय पर्साका प्रवक्ता तथा प्रहरी नायब उपरीक्षक (डिएसपी) चक्रबहादुर मल्लका अनुसार कारागारभित्र सरसफाइको काम गर्दै आएका साह सुरक्षाकर्मीको आँखा छलेर बिहीबार बिहान फरार भएका थिए । उनको कैद भुक्तान हुन अब २ वर्ष मात्रै बाँकी रहेको थियो ।

घटनालगत्तै पर्सा प्रहरीले व्यापक रूपमा खोजी अभियान तीव्र पारेको थियो । खोजतलासका क्रममा फरार साहलाई नेपाल–भारत सीमा नजिक पर्ने भारतको आदापुर क्षेत्र (मटिहर्वा भन्सार क्षेत्र नजिक)बाट नियन्त्रणमा लिइएको डिएसपी मल्लले जानकारी दिएका छन् ।

प्रहरीको तदारुकताका कारण फरार भएका कैदीलाई सीमा क्षेत्रबाटै छोटो समयमै पुनः पक्राउ गर्न सफल भएको प्रहरीले जनाएको छ । घटनाबारे थप अनुसन्धान तथा कारागारको सुरक्षा व्यवस्था बारे आवश्यक छानबिन भइरहेको छ । प्रहरिले जनाएको छ ।

नेपाल नेपाल न्यूज बैंक न्युज एजेन्सी हो ।